28-пи майиъ Дербент шагьриъ Дагъустан Республикайин табасаран милли культурайин автономияйин дахилнаъ республикайин Табасаран жигьиларин союз тешкил гъапIну. Союздин сабпи заседание милли культурайин автономияйин председатель Айваз Аьлихановди кIули гъубхну.

 

 

Заседаниейин вари иштиракчйирин разивалиинди жигьиларин тешкилатдин председателди Табасаран райондин жигьиларихъди ляхин гъабхру отделин кIулиъ айирин заместитель Руслан Керимов, хъа дугъан заместителар вуди — Республикайин жигьиларин центрин туризмдин проектар кIулиз адагъбан отделин кIулиъ айи Аьлимурад Аьлибегов, Госдумайин багахь хьайи жигьиларин парламентдин предпринимательствойин экспертарин советдин член, КIежюх гъулан депутатарин собраниейин депутат Мягьямед Насуров, Мажвгларин кьялан мектебдин завуч, Хив райондин депутатарин собраниейин депутат Мейлан Нежефов ва Дербентдин педколледждин илминна ахтармишарин ляхнин руководителин заместитель ва филологияйин мялим Лейла КIаручева ктагъну.

«Табасаран жигьиларин союз тешкил апIбан метлеб — республикайин жюрбежюр шагьрариъ ва районариъ яшамиш шулайи ихь жигьилар сатIи апIувал, дурар аргъаж хьуз, дурариз гьам жямяаьтлугъ, гьам политикайин, экономикайин, культурайин ва вари жара терефарин ляхнариъ хьуркьувалиинди улихь гъягъюз кюмек тувувал вуди гьисаб апIураза», – гъапну Руслан Керимовди.
Жигьилар – гьарсаб халкьдин гележег ву. Гъит ихь жигьиларин тешкилатдиз аьхю планар дивуз ва дурар хъуркьувалиинди кIулиз адагъуз кьувват ибшри!