Дагъустандиъ кьюрдуз алафар уч апIбан фасил ккебгъна. Гьамусяаьт гъулариъ айи гъулан мяишатдин зегьметкешар гьяракатниинди хярар уршвбиин машгъул дахьна. Республикайин гъулан мяишатдин ва ипIру-убхъру сурсатарин министерствойин пресс-гъуллугънаан туврайи мялуматариинди, цци региондиъ 1,7 млн тонна алафар уч апIуз планламиш дапIна.

 

 

Тарумовский райондин «Шанс» ООО мяишатдиз душнайи республикайин гъулан мяишатдин ва ипIру-убхъру сурсатарин министрин сарпи заместитель Шарип Шариповди мялум гъапIганси, цци Дагъустандиъ 130 агъзур гектар жилар дуршвну, кьюрдуз алафар уч апIиди. Му кьадарнакан 80 агъзур гектар жилариин уршвурайидар гизаф йисари шлу укIар, хъа вари имбунуб сад йисаз кIури киврайи укI-кьал ву.

Гъулан мяишат артмиш апIуз гьюкуматдин терефнаан кюмек туврайивализ лигну, «Шанс» мяишатдиъ хутIлар урзури магьа 3-пи йис ву. Цци душваъ 70 гектар хутIлариъ дубзнайи люцерна гьамусяаьт убшвури гьяракатнаъ а.

Мидланра гъайри, гьаму мяишатдиъ гъябгъюрайи йисан 140 тонна дюгю ккадабцIузра планариъ а. Мушваъ 180 гектар хутIлариъ дюгю дубзна. Му культура ухди хъубкьрайивализ лигну, мяишатдиъ айидари августдин вазлиъ, чвлин мархьар ургъуз хъюгъяйиз улихьна, хутIлариан дюгю уч апIуз планламиш дапIна.

«Аьхиримжи йисари Тарумовский райондиъ дюгю убзувалин ляхин лап улихь гъябгъюра. Гьамусяаьт райондиъ 4 агъзурна 800 гектариъ дюгю убзру хутIлар а. Гьюкуматдин терефнаанра кюмек хьувализ ва хутIлариз тувру штухъди вуйи месэла гьял апIбаз лигну, натижйирра ужудар шула», – аьлава гъапIну Шарип Шариповди.