Улихьна йигъари Расул Гьямзатовдин ччвурнахъ хъайи республикайин милли библиотекайиъ Дагъустан Республикайиъ ишлетмиш апIурайи газдихъди аьлакьалу темайиз бахш дапIнайи заседание кIули гъубшу. Думу заседаниейиъ республикайин энергетикайин министр Марат Шихялиев, «Газпром межрегионгаз» ООО-йин кIулин диспетчер Алексей Минченко, «Газпром межрегионгаз Махачкала» ООО-йин генеральный директор Ризван Мурадов ва хайлин жара касар иштирак гъахьнийи.

 

 

Республикайиз гъюрайи газдин гьякьнаан улхури, Алексей Минченкойи къайд гъапIганси, гъийин йигъан республикайиъ газдин саки 50%-дихьнакьан гьитIибкIура. Янаки убгурайи газдин кьадар гизаф ву, хъа дидхъан туврайи пулин кьадар лап цIиб. Гьаддиз республикайин варитIан гъагъи тереф – Мягьячгъала шагьрин Кировский район гъадабгъну, гьадушваъ ишлетмиш апIурайи газдин кьадар ахтармиш апIру приборар дивбан пилотный проект уьмриз кечирмиш апIуз хъюгъра.

Серенжемдиъ иштирак гъахьи Ризван Мурадовди гъапиганси, гъубгу газдин кьадар варитIан заан дережайин ачухъ’валиинди улупру гьаму деврин приборар кивбииди наан ва фукьан газ ишлетмиш апIураш ва гьаддикан фукьануб гьитIибкIураш, ишлетмиш гъапIу газдихъан шли лазим вуйи кьадарниинди пул туврадарш аьгъю апIуз хьибди.
«Киврайи газдин приборар, ишлетмиш апIурайи газдин кьадар улупрударси, эгер наанкIа авария гъабхьиш, дишлади сигнал туврударра ву.
Мидланра гъайри, пуз ккундузузки, таза приборар кивбан поект уьмриз кечирмиш апIури, агьалйирикан ккунди айиб анжагъ газдин гъуллугънан пишекрариз чпин гьяятаризди учIвуз ихтияр тувувал ву, хъа имбуну вари ляхнар газдихъди ляхин апIурайи тешкилатарин вазифа ву», – гъапну Ризван Мурадовди.