Майин 31-пи йигъан РД-йин культурайин министр Зарема Бутаева Табасаран райондиз гъафну.
Зарема Бутаевайихъди сатIиди муниципалитетдин кIулиъ айи Мягьямед Къурбанов, Гьюкуматдин табасарандин театрин директор Аьлимурад Аьлимурадов райондин культурайин швнуб-саб дараматдиз гъушну, дурарин ляхнихъди таниш гъахьну, милли проектдин дахилнаъди дибдиан кIули гъуху расвалин ляхнарин кьяляхъ Хьарагъ гъулаъ ва Хючнаъ культурайин дараматар ачмиш апIбан серенжемариъ иштирак гъахьну.
Расвалин ляхнар кIули духнайи культурайин хулариъ материалинна техникайин бина цIийи алапIна, мукьмар йивру алатар, сягьнайиин алахьру палтар, жара авадлугъар масу гъадагъна.
Гъулариъ культурайин хулар ачмиш апIбахъди аьлакьалу вуди, машгьур артистарин, фольклорин коллективарин иштирак’валиинди концертдин программа гьязур дапIнайи. Серенжемариъ чпин вазифйир ужуди тамам апIурайи культурайин идарйирин гъуллугъчйириз гьюрматнан грамотйир тувнийи.
Табасаран райондиъ «Ерли жягьтлувалар» программайин дахилнаъди Пилигъ гъулан культурайин хулаъра кIан’ан-кIулиз расвалин ляхнар духна.
Гъийин йигъаз дапIнайи ляхнин натижйирикан улхури, Мягьямед Къурбановди гьамци гъапну: «Республикайин культурайин министерствойин кюмекниинди гъулариъ культурайин идарйириъ лайикьлу шартIар арайиз хура. Расвалин ляхнар кIули гъахайиз мушваъ жюрбежюр серенжемар тешкил апIури шуйча. Хьадну манишнаан, хъа кьюрдну аьхълушнаан ктисуз шулдайи. Гъи мушваъ ляхин апIуз вари шартIар а.
Гьамус цIийи алаънайи культурайин идарйириъ лихурайи гъуллугъчйири чпин улихь дийигънайи месэлйир гьял апIбаз, гъуларин агьал-йирин культурайин уьмриъ ужудар дигиш’валар тIаъбаз ккилигидихьа».
Хьарагъ гъулаъ культурайин дарамат ачмиш апIбан серенжемдиъ удучIвну гъулху Зарема Бутаевайи къайд гъапIганси, рас дапIнайи Культурайин хал гъулан агьалйири чпин азад вахт адапIру, рягьятвал гъадабгъру йишв дубхьну ккунду.
«Гъи Табасаран райондиъ ужудар дигиш’валар духьнайивалиин гизаф шад вуза. Хъа гизафси культурайин цирклиъ лихурайидарин, бицIидарин разивали юкIв шад апIура. Дурар гьамцдар шартIариз ккилигури гизаф вахт гъабхьну», – гъапнийи Зарема Бутаевайи.
Хьарагъ гъулан культурайин хал гъубшу аьсрин 50-пи йисари тикмиш гъапIуб вуйи. Душваъ рягьятвал гъадабгъуз деврин тIалабариз гъилигу мумкинвал адайи.
Гъуландарин гафариинди, расвалин ляхнар гъахбан кьяляхъ культурайин хал лап уткан гъабхьну. Гьамус мушваъ инсанар дусру 60 йишв айи актовый зал, кьюрдну манишин тувру гъурулуш, ляхин апIру кабинетар, выставкйир гъахру йишвар а. Культурайин хулаъ Хьарагъ гъулан библиотека а, бицIидариз кружокар тешкил дапIна.
Культурайин дараматар ачмиш апIбахъди аьлакьалу серенжемарин кьяляхъ РД-йин культурайин министр «Ургур чвуччвун ва сар чуччун» гъалайиин ерлешмиш дубхьнайи тарихнанна юрд аьгъю апIбан музейиз гъушну. «Культура» милли проектдиъ иштирак хьувализ лигну, улихьнаси душваъ расвалин ляхнар кIули гъухну, экспозицияйин тяминатар цIийи алаъну, интерактивный экран кебхну.
Майин 31-пи йигъан Хючна гъулаъ Кьалухъ Мирзайин ччвурнахъ хъайи спорткомплексдиъ музейин цIийи филиалра ачмиш гъапIну.
Табасаран райондиъ Зарема Бутаева Искусствйирин мектебдиз, БицIидарин яратмишарин хулаз, багарихьди ачмиш апIуз планламиш дапIнайи модельный библиотекайиз гъушну.
Гъи Хючнаъ ачмиш апIуз гьязур апIурайи модельный библиотека жвуван аьгъювалар артмиш апIуз мумкинвал тувру аку йишв дубхьна. Душваъ мультимедийный зона, кинозал, «гергми столар» ва жюрбежюр гюрюшар гъахру йишвар а.
