30-пи майиъ Мягьячгъалайиъ Дуствалин хулариъ Дагъустан Республикайин Жямяаьтлугъ палатайин членарин собрание кIули гъубшнийи. Собраниейиъ Дагъустан Республикайин аьтрафариин гьисабназ гъадагънайи ерли жямяаьтлугъ тешкилатари улупнайи кандидатарикан Жямяаьтлугъ палатайиз 15 член кадагъну ккундийи. 

 

 

Дагъустан Республикайин 2006-пи йисан 17-пи ноябриъ 48-пи нумрайиккди адабгъу къанундиз асас вуди, региондин Жямяаьтлугъ палатайин дахилнаъ 45 член ади ккунду. Думу кьадарнакан 15 кас Дагъустан Республикайин Главайи, 15 кас РД-йин Халкьдин Собраниейи тяйин апIуру. Хъа имбуну 15 кас гьаму Жямяаьтлугъ палатайин 30 членди ерли жямяаьтлугъ тешкилатари улупнайи кандидатарин арайиан тяйин дапIну ккунду.

Собраниейиз уч духьнайи Жямяаьтлугъ палатайин членари 8-пи дих апIбан Жямяаьтлугъ палатайин имбуну пай тяйин гъапIнийи. Дурарин арайиъ Мягьячгъалайин пишекарвалин ери за апIбан «Каспий» центр-академияйи улупу ихь ватанагьли, ДГУ-йин политэкономияйин кафедрайин заведующий, профессор, Дагъустандин лайикьлу экономист Низами Аскеровра а.

«Табасарандин нурар» газатдин редакцияйин коллективди Низами Аскеров РД-йин Жямяаьтлугъ палатайин членди ктагъувалихъди тебрик апIури, дугъаз мюгькам сагъ’вал, халкьдин яшайишдин месэлйир гьял апIбак лайикьлу пай кивбаъ хъана заан хъуркьувалар ккун апIура.