РД-йин Роспотребнадзорин пресс-гъуллугънаан мялум гъапIганси, хьадан тятIилар ккергъу садпи йигъхъан башламиш дапIну, республикайин аьтрафариин ерлешмиш духьнайи бицIидарин лагерари баяр-шубариз чпин раккнар арццну.

 

 

Гьаци цци сабпи сменайиъ Дагъустандин лагерариъ 6250 бицIири рягьятвал гъадабгъиди. Мидланра гъайри, июндин эвелариан башламиш дапIну, мектебарин бинайиинди тешкил дапIнайи бицIидарин лагерарра гьяракатнаъ ирчди.

Гъийин йигъаз республикайиъ гьяракатнаъ ирчнайи вари 25 лагери санитарияйи-нна эпидемиологияйин вари тIалабар тамам дапIна.
Гьяйифки, Хив райондин табиаьтдин успагьивализ ва ужудар мумкинвалариз дилигди, гъийин йигъаз душваъ саб лагерра абццуз мумкинвал гъабхьундар. Хив райондин образованиейин отделин кIУлиъ айирин заместитель Азадин Юсуфовдин гафариинди, баяр-шубарин лагерар тешкил апIбан кьюбпи сменайиъ ЗахитI гъулан мектебдин бинайиинди йигъандин лагер абццуз планламиш дапIна.

«Июль вазлин эвелариъ ЗахитI гъулан мектебдин багахь 20 бицIири рягьятвал гъадабгъуз мумкинвал айи лагерь ачмиш апIбанди вуча. Лагерь йигънутIан либхудар. Гьаддиз дина Ляхла, ВертIил ва гьацдар жара ярхлади ерлешмиш духьнайи гъуларин бицIидарихьан, икибаштIан, гъюз хьибдар. Хъа багахь гъулариан иштагь айидариз ккилигурача. Думу лагерь 20 йигъан либхиди. Лагериз касиб хизанариан вуйи ва гьацира СВО-йиъ иштирак шулайи эскрарин веледарра кьабул апIуру», –гъапну ич сюгьбатнаъ Азадин Юсуфовди.