2-пии юндиан 6-пи июндизкьан Табасаран райондиъ Сибириан вуйи 10 туроператорар ва цирклиъ ляхин апIурайи федеральный экспертар иштирак духьну, муниципалитетдиъ туризмдин циркил артмиш апIбан стратегияйиз бахш вуйи туриствалин 1-пи форум кIулиъ гъубшну. Форум гъабхбан асас себеб – туризмдин цирклиъди ляхин апIурайи гостиницйир, хялар кьабул апIру хулар, ресторанар ва кафйир ужуб къайдайиз хувал ва райондиз дуфнайи экспертари ва туроператорари чпин ляхнихъди ва цирклиъ арайиз дуфнайи цIийи къайдйирхъди, технологйирихъди ерли пишекрар таниш апIувал вуйи.

 

 

Форумдиъ Хялар кьабул апIбан индустрияйин жямяаьтлугъ союздин вице-президент Наталия Осиповайи, «Сибирское соглашение» кIуру регионарин арайиъ вуйи ассоциацияйин департаментдин кIулиъ айи Татьяна Рымари ва Сибирин кIакIначи туроператорин вакилари туризмдин цирклиъ чпиз айи тажрубайикан ктибтнийи.
Саки гьяфтайин арайиъ кIулиъ гъубшу форумдин дахилнаъди райондиз дуфнайи хялар форумдин эйсйири ихь тарихдихъди, милли хурагарихъди, халкьдин сяняаьткарваларихъди таниш гъапIну, дурариз Табасарандин табиаьт, райондиъ айи гостиницйир ва хялар кьалар апIру хулар улупну.

Табасарандиз гъафиган чпиз улупуб ва гъябкъюб туроператорари гьамус Сибириан ухьухьна гъюру туристариз улупну ккунду. Янаки гьамусдихъантина Сибириан Табасарандиз туристар хъади гъюрайи туроператорари маршрутар 5 йигъаз гьязур апIиди. Гьадму гьисабнаъди бицIидарин туризм, аьхюдарин ва аьхюдарин гьевеслувалин туризм терефарин турар тешкил апIиди.
Мидланра гъайри, Табасаран райондин администрацияйин пресс-гъуллугънаан тувнайи мялуматариинди, форумдин дахилнаъди муниципалитетдиъ туриствалин сабпи компанияра тешкил гъапIну. Думу компанияйи, райондиз туристар кьабул апIбан бадали, туристдиз самолетдиъди ваяя жара тарнспортдиъди вушра билет гъадабгъабалан ккебгъну, райондиз дуфну кьяляхъ аьгъяйизкьан алахьурайи вари месэлйир чпиина гъадагъну, гьял апIиди.

«Дагъустандин гьарсаб терефнан утканвал гъябкъиган, гьяйран шулу. Табасаран райондиз гъяйиз, учу Мягьячгъала ва Дербент шагьраризтIан гъилигундарча, хъа му райондиз дуфну, мушваъ айи гъулар, табиаьтдин утканвал гъябкъхъанмина, Табасаранди ич гьарурин юкIвар гьевеслу гъапIну ва учуз гъябкъюбра гьаммишандиз фикриъ гъубзди. Му райондиз чаз барабар вуйи жара район адар. Ич туристариз мушваъ лап кьабул шлувалиин умудлу вуза», гъапнийи Табасаран райондиъ кIулиъ гъубшу форумдин натижйир йивури, мина дуфнайи Татьяна Рымари.
Департаментдин кIулиъ айирира чпи гьамци кьабул апIбаз Мягьямед Къурбановдиз чухсагъул мялум гъапIну ва багарихьди Москвайиъ кIули гъябгъру Сибирин йигъариъ райондикан вуйи презентацияра хьади иштирак хьуз теклиф дивну.

Чан терефнаан Мягьямед Къурбановдира варидиз чухсагъул гъапну, ва гьаму йигъарин арайиъ дуфнайи хяларира, райондин администрайияйин гъуллугъчйирира, Табасаран райондин ва Дербент шагьрин туризмдин цирклин вакиларира саб командайиси сатIиди ляхин апIуваликан гъапну.
«Форум кIули гъабхбиинди уьмриз кечирмиш апIуз хъюгъю проект, саки 5 йисазкьануб ву. Гъи форум аьхирихъна гъюб’инди йивурайи натижйир, анжагъ сифтейиндар дар. Гьаму командайи гьамци сатIиди ляхин апIбиинди, ухьу гьамусдихъантинара мяналу натижйир улупбиин умудлу вуза», — аьлава гъапIну райондин главайи.