6-пи июндиъ Мягьячгъалайиъ Дуствалин хулариъ РД-йин Главайин ва Правительствойин администрацияйин кIулиъ айи Алексей Гьясановдин регьберваликкди, РД-йин Правительствойин председателин заместитель Рамазан Жяфаровдин ва Дагъустандин шагьраринна районарин, гъуларин главйирин иштирак’валиинди «Муниципальный образованйирин советдин» ассоциацияйин правлениейин заседание кIули гъубшну.

 

 

Уч духьнайидарихьинди илтIикIну, Алексей Гьясановди ассоциация Дагъустандиъ ерли самоуправление артмиш апIбан мюгькам дакьат вуйивал къайд гъапIну. Дугъан гафариинди, гъийин читин аьгьвалатнаъ республикайин жямяаьтлугъдиз сабвал ва ватандаш кьягьялвал лазим ву. Алексей Гьясановди Дагъустандин шагьрарин ва районарин главйириз хусуси метлеб айи дявдин операция-йин тереф уьбхюрайивализ, СВО-йиз душнайидарин хизанариз кюмек тувбаз, Урусатдин эскрари женгар гъахурайи йишваз рягьимлувалин кюмек хътапIбаз чухсагъул мялум гъапIнийи.
Заседаниейиъ гьял апIуз региондиз важиблу вуйи, гьадму гьисабнаан муниципальный гъуллугънаъ айидарин маважиб за апIбахъди аьлакьалу месэлйир адагънайи.

Муниципальный гъуллугъчйирин маважиб за апIбан гьякьнаан Табасаран райондин кIулиъ айи Мягьямед Къурбанов удучIвну гъулхнийи. Дугъу къайд гъапIганси, маважиб цIибди вуйивализ лигну, райондиан жигьил пишекрар удучIвну гъягъюра. Гьадму себеб вуди, муниципалитетдин администрацияйиъ айи гъуллугъариина пишекрар тяйин апIуз кIули гъахру конкурсариъ сар каскьан иштирак шуладар.

Мягьямед Къурбановди гъапиганси, гъийин йигъаз райондин главайиз гъуллугъчйирин маважиб тувбан шартIар дигиш апIуз ихтияр адар, думу месэлйир гьял апIувал республикайин правительствойин ихтиярнаъ а. Муниципалитетдин администрация региондин финансарин министерствойиз, зегьметнан ва яшайишдин артмиш’валин министерствойиз, Счетный палатайиз ва жара идарйириз швнубна-саб ражари илтIикIнушра, месэла гьял дубхьнадар.

Гьаддиз Мягьямед Къурбановди республикайин Глава Сергей Меликовдикан муниципальный гъуллугъчйирин маважиб за апIувалин месэла гьял апIуз кюмек ккун гъапIнийи.