7-пи июндиъ Москвайиъ Федерацияйин Советдиъ Расул Гьямзатовдин йигъар ачмиш гъапIну. Серенжемдиъ Федерацияйин Советдин председатель Валентина Матвиенко, Урусатдин Федерацияйин Правительствойин вице-премьер Татьяна Голикова, РД-йин Глава Сергей Меликов, Дагъустандин терефнаан Федерацияйин Советдиъ айи Ильяс Умаханов, шаирин риш Салихат Гьямзатова, РФ-дин сенаторар ва гьюрматлу хялар иштирак гъахьну.
Сифте вуди парламентдин заан палатайиъ театрин сягьна улупнийи. Дуфнайи хялариз ГИТИС-дин театрин артистари шаирин машгьур шиърар гъурхнийи.
«Гьаму йисан машгьур шаир, писатель, жямяаьтлугъ ва гьюкуматдин гьяракатчи, Дагъустан халкьдин машгьур бай Расул Гьямзатовдин 100 йис къайд апIурахьа. Гьюкуматдин кIулиъ айи Владимир Путиндин табшуругъниинди Расул Гьямзатовдин 100 йисандин юбилей гьязур апIбан ва кIули гъабхбан тешкиллувалин комитет яратмиш гъапIнийи. Уьлкейин гизаф регионариъ гьаму машгьур касдин ччвурнахъди аьлакьалу вуйи выставкйир, жюрбежюр маракьлу серенжемар кIули гъахура, Расул Гьямзатовдин шиърар урхура. Хъа гъи ухьу Федерацияйин Советдиъ Расул Гьямзатовдин йигъар ачмиш апIурахьа. ГвачIнинган театрин сягьна улупну, гьамус Расул Гьямзатовдин машгьур ирснан – китабарин, шикларин выставкайихъди таниш хьуз шулу», – гъапнийи Валентина Матвиенкойи чан удучIвну улхбаъ.
«Расул Гьямзатовдин Ватандихьна вуйи ккудудубкIру ккунивализ, дугъан зигьимлувализ, гафнан учIрувализ заан кьимат тувра. Дугъу чан халкьдиз ва чан китабариз кьюб Ватан айиваликан: багъри Дагъустан ва аьхю Урусат кми-кмиди кIура», – аьлава гъапIнийи Валентина Матвиенкойи.
Федерацияйин Советдин кIулиъ айири къайд гъапIганси, шаирин гизаф ужудар эсерар а. Хъа дурарикан варитIан машгьуруб «Кьарнийир» шиир ву. Думу шиъриъ дявдин женгариъ гъийиху эскрарихъан пашманвал зигура, инсандин рюгь гьаргандиз чIивиди гъубзувалик умуд кивра.
«Кьарнийир» шиир бинади гъадабгъну, ЮНЕСКО-йи Лизи кьарнйирин машквар къайд апIури, магьа 13 йис ву.
«Расул Гьямзатовди чан эсерариинди Ватандин литература девлетлу гъапIну. Дугъу чан багъри авар чIалниинди гъидикIу эсерар урус чIалназ ва дюн’яйин гизаф чIалариз таржума дапIна. Хъа чав Расул Гьямзатовди ихь машгьур шаирар вуйи Александр Пушкиндин, Михаил Лермонтовдин, Сергей Есениндин таржума гъапIу эсерар дагъустандин халкьарин арайиз адагъну ва халис урус чIал ахтармиш апIуз мумкинвал тувну», – гъапнийи Расул Гьямзатовдин 100 йисандин юбилей гьязур апIбан ва кIули гъабхбан тешкиллувалин комитетдин кIулиъ айи Татьяна Голиковайи.
Серенжемдиъ иштирак шулайи Дагъустандин Глава Сергей Меликовди чан удучIвну улхбаъ Расул Гьямзатовдин «Дагъустан Республикайин мухбир вуза» кIуру гафар кIваина гъахнийи. «Федерацияйин Советдин хулариъ машгьур шаирин Ватан Дагъустан вуйивалиин узу гизаф шад вуза», – гъапнийи Сергей Меликовди. Дугъу уьлкейин кIулиъ айи Владимир Путинди Дагъустандихьна, Расул Гьямзатовдихьна вуйи чан асас гьюрмат улупбаз чухсагъул мялум гъапIнийи. «Гизаф уьлкйириз гъушу Расул Гьямзатовди чаз хас вуйи шаирвалин гафниинди гизаф миллетарикан арайиз дуфнайи гьюкумат улупуйи. Дугъу СССР-ин Верховный Советдин Президиумдин член, гьюкуматдин машгьур кас вуди халкьарин арайиъ ислягьвал мюгькам, аьлакьйир яркьу апIбак чан кьалмиинди ва гафниинди пай кивну», – гъапну Сергей Меликовди.
Совет Федерацияйиъ Р. Гьямзатов-дин йигъар ачмиш апIбан серенжемдин аьхириъ шаир бабкан духьну 100 йис тамам хьпаз бахш вуди «Расул Гьямзатов» почтайин марка адабгъбан серенжемра кIули гъубшнийи.
