Саб-кьюб гьяфта улихьна Дагъ. Огни шагьриъ ерлешмиш дубхьнайи БицIидарин яратмиш апIбан хулаъ Лиманат Эмурбеговайихъди таниш гъахьунза. Таниш хьувалин асас метлебра ихь адлу артист дишагьли Марьям Къазиевайи апIурайи «Мюгьюббат» кIуру мяълийин гафар гъидикIу авторикан артухъди мялуматар гъадагъувал вуди гъабхьнийиз.
Лиманат Эмурбегова гизаф маракьлу сюгьбатчи ву. Дугъу узуз жи-къиди чан уьмриканра ктибтнийи ва 2022-пи йисан Мягьячгъалайиъ чап гъапIу чан «Мюгьюббат» кIуру шиърарин сабпи китабра багъиш гъапIнийи. Дугъан шиърарихъди ва уьмрихъди таниш гъахьиган, кIулиз гьамциб фикир гъафнийиз: аьхиримжи йисари шиърар дикIурайидарин кьадар артухъ хьуз хъюгъна, ва дурарин аьхюну пай улихьди чпин яратмиш’валин мумкинвалар улупуз дархьи дишагьлийир ву. Гъи дурар, цIибди начра кади, жямяаьтлугъди чпин шиърариз фициб кьимат тувдикIан кIури, фикрарикк ккахьна. Гьаддиз гъи ухьу дурариз, чпин яратмиш’валин рякъ ачухъ апIуз, гьелбетда, ухьхьан удукьру кюмек тувну ккунду.
Лиманат Табасаран райондин ТIюрягъ гъулаъ Эмурбеговарин аьхю хизандиъ бабкан гъахьну. Дурарин хизандиъ ургур риш ва кьюр бай айи. Лиманат веледарикан варитIан аьхюнур вуйи.
– Увуз шиърар, мяълийир дикIуз мициб бажаранвал айивал гьаз кьанди ачухъ гъапIунва? – гьерхнийза ич сюгьбатнан эвелиъ Лиманат Эмурбеговайихьан.
– Узу 1975-пи йисан бабкан гъахьунзу. Ухьуз варидариз мялум вуйиганси, думу вахтна дишагьлийириз чпин бажаругълувалар улупуз думукьан мумкинвалар ади гъахьундар. Дишагьли урхуз гъягъювал, дугъу мяълийир апIувал аьйибнан ляхинси гьисаб апIуйи. Ич гъулан, хулан аьхюдари, дишагьлийиз вуйи кеспнан ляхин халачи убхуб ву, кIури гъахьну. Думуган дишагьлийиз халачитIан савайи жара ляхин адайи. Узу ич хизандиъ варитIан аьхюну велед вуйза, адашдиз чIатан ляхнариъ, дадайиз – хулан ляхнар апIбаъ кюмекчи вуди гъахьунза. Гьадму себеб вуди, узхьан заан аьгъювалар гъадагъуз гъабхьундарзухьан. Йиз багъри ТIюрягъ гъулан кьялан мектебдиъ 9-пи класстIан ккудубкIундарза. Амма бицIи вахтнахъанмина мукьмариин ва ихь багъри литературайиин юкIв алир вуйза. Ва 18 йис гъабхьихъанмина, йиз фикрар ачухъ апIури, шиърар дикIуз хъюгъюнза. Аьхир йиз уьмриъ гъахьи дигиш’валарихъди аьлакьалу вуди, саб хайлин вахтна бикIувал дипунза. Гъи, узуз хъанара мумкинвал дубхьну, йиз юкIв хъайи ляхин давам апIуз хъюгъюнза.
– Лиманат Муртазялиевна, ичв хизандиъ, увутIан савайи, мициб бажаругълувал кайир сарун фужкIара гъахьнийин?
– Ав, йиз адаш каманчи йиврур вуди гъахьну. Ич хизан, йиз чйир-чвйир, адашдин чвйир-чйир, жюрбежюр алатариин мукьмар йиврудар вуди гъахьну. Мяълийир апIрударин десте тешкил апIури, гъулан ва райондин жюрбежюр мяракйириъ иштирак шулийча. Аьхирки, му ляхин мусурмнариз хас вуйиб дар кIури, саб яш гъабхьи чйир-чвйири дин хъапIуз хъюгъну. Хъа узу думу ляхниинра, йиз багахьлуйир Аллагьдин рякъюъ айивалиин, гизаф рази вуза.
– Яв яратмиш апIбариз сифте фикир тувур, увуз кюмек гъапIур фуж ву?
– Сифте вуди йиз шиърариз фикир тувур йиз дугъри багахьлу, Дагъустандин гьюкуматдин гъулан мяишатдин университетдин сарпи проректор Мукаилов Жабраил Мукаилович вуйи. Гьадму касдин кюмекниинди йиз сабпи шиърарин китабра чап гъапIунза. Дугъаз аьхю чухсагъул. Ва гьацира Дагъ. Огни шагьриъ ерлешмиш дубхьнайи БицIидарин яратмиш апIбан хулан директор Гьябибат АьбдулмутIелимовна Уьмаровайира аьхю фикир тувнийи. Сифте дугъу узу сар ужур касдихъди таниш гъапIну. «Эгер увуз гележегдиъ яв яратмиш’валин рякъ давам апIуз ккундуш, ухьуз бажаранвал кайи вари инсанариз кюмек апIру кас а. Думу ихь шаир Эльмира Аьшурбегова ву», – къайд гъапIнийи дугъу. Телефондиан зенг дапIну, Эльмира, ухьуз сарсана шиърар, мяълийир дикIру кас а, ухьу дугъаз кюмек дапIну ккунду, гъапнийи Гьябибат Уьмаровайи. Эльмира Аьшурбеговайихъди узу гьелелиг телефондиантIан таниш гъахьундарза, амма думу касдихъди гафар гъапIган, узу хъюгънайи ляхин давам апIбак хъанара умуд кивунза. Хъа Эльмирайи кюмек апIуз гаф тувну, багарихьди гюрюшмиш хьуз йикьрар гъапIунча. Инсандин уьмрин рякъюъ ужур, ягъурлу кас кьисмат хьубра аьхю бахт ву. Гъи ихь халкьдин арайиъ гьамцир жавабдар кас айивали фукьан бикIурайидариз яратмиш’валин рякъяр ачухъ апIуз мумкинвал тувра.
– Уву гъидикIу гафариз сарун шли мяълийир апIура?
– Нурудин Аьбдуллаевди, Румина Гьюсейхановайи, Гуля Юзбеговайи йиз гафариз мяълийир апIура.
Лиманат Эмурбегова гъи Дагъ. Огни шагьриъ дуланмиш шула. Дугъаз сар жили веледтIан адар. Лиманат зегьметкеш дишагьли ву. Гьамусдин деврин дишагьлийириз гъазанмиш апIуз фукьан вушра мумкинвалар а. Гъи Лиманатди, чан хулан гьяятдиъ уьлер уржру саб бицIи йишв ачмиш дапIну, гьар йигъан ягъчIвурихьна дуржнайи уьлер масу туври, чан мадар апIура. Завариан цIа убгъури, йигъан му кьадар уьлер уржувал ялгъуз касдиз гизаф зегьмет айи, гъагъи ляхин ву.
Гъит Лиманатдиз уьмриъра, яратмиш’валин рякъюъра хъуркьувалар ишри, хъа дугъан веледдиз Аллагьди сагъ’вал туври.
