Гъубшу гьяфтайиъ республикайин хайлин муниципалитетариъ, хъа асас вуди Буйнакск шагьриъ, Леваши ва Гуниб районариъ аьхю мархьар-селлер ва мирккар гъургъну. ВаритIан гизафси зарар гъабхьи йишв Буйнакск шагьур ву.

 

Табиаьтдин кIваин алдру балайикан хабар гъабхьиган, республикайин Правительствойин председатель Аьбдулмуслим Аьбдлмуслимов гьяракатниинди Буйнакскдиз гъушну, ва дугъу душваъ кIули гъубху совещаниейиъ Дагъустандин Глава Сергей Меликовди зарар гъабхьи хизанариз кюмек апIуз буйругъ тувнайиваликан мялум гъапIну.

«Сабпи нубатнаъди шагьрин агьалйир газдихъди, электроэнергияйихъди ва штухъди тямин апIувал чарасуз лазим ву. Гьаддихъди сабси, аьхю селлер ургъбаан чIур гъахьи рякъярра къайдайиз духну ккунду. Хъа миркк убгъбахъди аьлакьалу вуди зарар гъабхьи хулар, гьяятар аш, дицдаризра къанундиинди кюмек апIиди», – гъапну Аьбдулмуслим Аьбдулмуслимовди.
Совещаниейин кьяляхъ республикайин премьер-министр зарар гъабхьи хулариз ва яшайишдин объектариз лигуз гъушну.

Асас вуди миркк убгъувал себеб дубхьну, гизаф хуларин гъваар барбатI гъахьну. Гъваарикан урхъар кадахьну хайлин хуларин айитIинди шид убчIвбаз лигну, душвариъ айи мутмйирра чIур гъахьну. Аьбдулмуслим Аьбдулмуслимовдихъди гюрюшдиъ иштирак гъахьи Буйнакск шагьрин глава Исламудин Нургудаевди мялум гъапIганси, мархь, миркк убгъбахъди аьлакьалу вуди зарар гъабхьи шагьрин агьалйирин кьадар агъю апIбан бадали, хулариз гъягъюри ахтармишар гъахру 25 десте тешкил дапIна.

Гьамусдиз айи мялуматариинди, асас вуди мирккли зарар тувдар 2 агъзуртIан артухъ хусуси ва 33 гизаф мертебйирин хулар, 7 мектеб ва 14 бицIидарин багъар ву.

Буйнакскдин администрацияйи шагьрин агьалйирихьан зарар хьпан гьякьнаан аьрзйир кьабул дапIна. Ляхин давам шули ими. Му читин месэла республикайин Главайин гюзчиваликк кка. Хъа 19-пи июнди-хъанмина ккебгъну, шагьрин главайи адабгъу къарарназ асас вуди, шагьур кьадарсуз читин аьгьвалатнан къайдайиъ айибси гьисаб дапIна.