Гъубшу гьяфтайиъТабасаран райондин администрацияйиъ «Табасарандин тарихи артмиш’валин кIварар» ччвур тувнайи гергми стол кIули гъубшну.
Серендемдин иштиракчи, табасаран халкьдин агъсакъларин советдин председатель Исамудин Рамазановди гьамусдихъантина «Дагъустандин тарих» китабариъ Урусатдин Игитар вуйи Рустам Мурадовдикан, Эседуллагь Абачевдикан, Руслан Къурбановдикан, Исрафил Мягьямедовдикан, Нурмягьямед Гьяжимягьямедовдикан ва имбуну баяриканра чарасуз вуди мялуматар ади ккуниваликан гъапну.
Серенжем Мягьямед Гьясановдин жягьтлувалиинди тешкил гъапIуб ву, ва думу совещаниейиъ Табасарандин тарихнан вуйи докладарра гъурхну. Мина уч духьнайидари Табасарандин тарихнан гьякьнаан чпин фикрарра ачухъ гъапIну ва, гъуларин тарихар артухъди ахтармиш апIбан бадали, либхру десте тешкил апIбан йикьрарра гъийитIну. Совещаниейин иштиракчи Алавудин Мирзабалаевди гъюру 2024-пи йис Табасаран райондиъ тарихнан йисси къайд апIбан месэла за гъапIну. Райондин глава Мягьямед Къурбанов му месэлайиин рази гъахьну, гъюру йис райондиъ «Табасрандин тарихнан йисси» къайд апIувал планламиш гъапIну.
Табасаран халкьдин тарихназ бахш дапIнайи гергми стол аьхирихъна гъюри, пофессор Мягьямед Гьясанов райондин главайи «Табасаран райондин гьюрматлу ватандаш» ччвур тувбиинди лишанлу гъапIну.
