Гьаму йигъари 2021-пи йисхъан мина вахтназ вуди Дагъустандин государствойин педагогвалин университетдин ректорин вазифйир тамам апIури гъахьи ихь ватанагьли Нариман Асваров Урусатдин мярифатнан министерствойин буйругъниинди, ДГПУ-йин ректорди тасдикь гъапIну.
Къайд апIуб лазим вуки, гъябгъюрайи йис педагогдин ва мялимдин йис вуйивализ лигну, Дагъустандин государствойин педагогвалин университетдиз Дагъустан Республикайин халкьдин шаир Расул Гьямзатовдин ччвурра тувну.
Учв Нариман Асваров гьаму университетдин выпускник ву. Хайлин йисари думу ДГПУ-йин тарихнан факультетдин деканди лихури гъахьну. Гьацира думу «Саб вуйи Урусат» партияйин республикайиъ айи политикайин советдин президиумдин членра ву. Мидланра гъайри, Нариман Асваров хъади-хъади хайлин йисари Дагъустан Республикайин Халкьдин Собраниейин депутатдира гъилихну.
«Табасарандин нурар» газатдин коллективди Нариман Асварович ДГПУ-йин ректорин гъуллугънаъ тасдикь апIбахъди мубарак апIури, дугъаз мюгькам сагъ’вал, ляхниъ хъуркьувалар ккун апIура.
