«Табасарандин нурар» газатдин чапдиан удубчIву 24-пи нумрайиъ, Табасаран райондин ТIаттил гъулан кьялан мектебдиъ урхурайи Гьаваханум Мягьямедовайи урус чIалнан ЕГЭ-йиан 100 балл гъадагъну кIури, жикъи мялумат тувнийча. Хъа 25-пи июндиъ, Гьаваханумди биологияйиан вуйи ЕГЭ-ра 100 баллиз тувну кIури, мялум гъапIунчуз. Къайд апIуб лазим вуки, мициб натижа республикайиъ анжагъ сабтIан дар. Хъа гъи Гьаваханумдикан вуйи макьала цIиб яркьудиси туврача.
Гьаваханум Мягьямедова Табасаран райондин ТIаттил гъулан Аьгьмед ва Умгьанат Мягьямедоварин риш ву. 2012-пи йисан сабпи ражари вуди мектебдиз гъушхъанмина дугъу вари дарсариан ужудар кьиматариз урхурайи.
ТIаттларин кьялан мектебдин директор Шагьзада Эскендеровайин гафариинди, Гьаваханум, гьар йисан райондиъси, республикайин дережайиъди кIули гъягъру мектебдиъ урхурайидарин арайиъ вуйи олимпиадйириъ вая жара конкурсариъ аьшкниинди иштирак шули, ужудар натижйирра улупур ву.
«Аьхиримжи йисарин арайиъ думу учв иштирак шули гъахьи олимпиадйириъ гьаммишан 1-пи ва 2-пи йишван сагьиб шулайи. Ужуди дарсар урхурайивализ лигну, Гьаваханумдиз райондин глава Мягьямед Къурбановдин ччвурнахъан вуйи стипендияра туврайи. Аьхю классариъ урхуз хъюгъхъанмина, духтир шулза кIури, кьаст дапIну, зегьмет зигурайи риш ву. Гьарсар мектебдиъ урхурайи бализ-шураз, мектебдин мялимариси, хулаъ абйир-бабарира кюмек апIуб чарасуз лазим ву. Гьаваханумдин дада Умгьанат ич мектебдиъ бицIи классариз дарсар киврайи мялим ву. Дугъура гьаммишан чан шураз агъювалар гъадагъуз кюмек апIури гъахьну. Гьаци вари ич мектебдин мялимарира. Думу ляхин Гьаваханумди туву ЕГЭ-йин натижйирира тасдикь апIура.
Урус чIал – 100 баллиз, биология – 100 баллиз, химия – 93 баллиз ва математикара 5-диз тувну.
Пуз ккундузузки, фуну мектебдиъ вушра, эгер урхурайиз урхуз аьшкь аш, дугъаз фуну мялимра гьаммишан кюмек апIуз гьязур ву», – гъапну мектебдин директори.
Аьхиримжи йисари райондин дережайиъди кIули гъушу олимпиадйирин натижйириинди, Гьаваханум Мягьямедова обществозна-ниейиан ва географияйиан 2-пи йишварин сагьиб духьну, республикайин образованиейинна илмин министерствойин дипломдиинди лишанлу дапIна.
Райондин мектебариъ урхурайидарин арайиъ урус чIалнаан, тарихнаан, биологияйиан, химияйиан кIулиъ гъушу олимпиадйириъ 1-пи йишварин сагьиб гъахьну.
Мидланра гъайри, Гьаваханум Мягьямедова, урхбаъна олимпиадйириъ ва илмин ахтармишарин ляхнариъ ужудар натижйир улупурайивализ лигну, Табасаран райондин главайин грантдин сагьибра ву.
