1993-пи йисан 24-пи июндиъ думуган Урусатдин кIулиъ айи Борис Ельцинди, 459-пи нумрайин буйругъниин къул дизигну, 27-пи июнь Жигьиларин йигъси тасдикь гъапIну.
Дюзди кIуруш, му машкврин кIулар совет гьюкуматдиан гъюра – 1958-пи йисан 7-пи февралиъ адабгънайи къарариз асас вуди, му машквар гьар йисан июндин аьхиримжи базар йигъан къаршуламиш апIури гъахьнийи.
2023-пи йисан Урусатдин Президент Владимир Пу-тинди му машквар къайд апIбаъ дигиш’валар тIаъбан буйругъ адабгъну. Дидиз асас вуди, гьамус Жигьиларин йигъ июндин аьхиримжи киш йигъан къайд апIура. Цци думу йигъ 24-пи июндиин алабхъну.
Жигьиларин йигъ къайд апIури, цци Урусатдин саки вари шагьрариъ ва районариъ яркьу серенжемар ва фестивалар кIули гъухнийи. Хив районра гъирагъдиъ гъубзундайи.
23-пи июндиъ РКДЦ-йин улихь армрестлингдиан, гиря за апIбаан, тIил зигбаан талитар ва концертдин программайин мярака кIули гъушнийи. Му серенжемариъ райондин кIулиъ айидар, депутатар, хайлин гъуларин жигьилар, волонтерар, мектебарин мялимар ва директорар иштирак гъахьнийи.
Сифте спортдин талитар кIули гъухнийи. Хъасин концертдин программа ккебгъиган, дурарин натижйир гъивнийи. Дурарихъди учвура таниш апIураза.
Хилар ккирчбан гьюжатнаъ 1-пи йишв Асккан Ярккан вуйи Аьлиев Шихягьмаддиз кьисмат гъабхьнийи, 2-пи йишв Чювекк гъулан агьали Агъабалаев Амири гъадабгънийи, хъа 3-пи йишван сагьиб Асккан Ярккан вуйи Аьлипашаев Шамил гъахьнийи.
24 кг гъюру гиря за апIбаан талитнаъ пешкешнан шубби йишваринра сагьибар Асккан Яракк гъулан баяр гъахьнийи: 1-пи йишв Шихгереев Рамазну, 2-пи йишв – Аьлиев Шихягьмадди ва 3-пи йишв – Аьлипашаев Шамили гъадагънийи.
ТIил зигбаан 1-пи йишв лайикьлуди Хив гъулан командайи гъазанмиш гъапIнийи, 2-пи йишв Асккан Яракк гъулан командайи, хъа 3-пи йишв Хирижв гъулан командайи гъадагънийи.
Серенжемдиз уч духьнайи агьалйирин улихь Хив райондин кIулиъ айи Ярмет Ярметов удучIвну гъулхнийи.
«Гьюрматлу ярар-дустар! Сабхилди ухьуз варидиз му йигъ марцци кIваан тебрик апIураза. Зарафатсуз, фукьан яшар гъахьишра, ухьу юкIвариинди жигьилар вухьа. Ухьу гьарган кIваъ ха-йирлу ниятар ади жигьилди гъузри. Гьаму йигъари мектеб ккудубкIурайи выпускникарихьна ва аргъаж шулайи наслихьна илтIикIури, пуз ккундузузки, гъит ичв гележег акуб ва нурлуб ибшри, кIваъ айи ужудар хиялар, мурад-метлебар бегьем ишри.
Гьелбетда, ухьуз му йигъ гьамци шадди ва яркьуди къаршуламиш апIуз мюгьлет туврайи, дявдин цIин майдандиъ чпин жанар фида апIурайи ихь эскрарра кIваин дарапIди гъитуз шулдар. Гъит дурар гьаму йигъари гъалибвал хьади багъри ругариина чпин хизанарихьна хъадакну гъюри.
Гъит ихь юкIвариъ кабхьнайи мукьмин ва жигьилвалин гьевес саб вахтнара ухьхьан вархи дарибшри!» – гъапнийи главайи.
Натижйир йивури, Ярмет Ярметовди спортдин талитарин гъалибчйир ва пешкешнан йишварин сагьибар, волонтерар, хъуркьувалиинди мектеб ккудубкIу выпускникар, ГТО ужуди тувнайи урхурайидар гьюрматнан кагъзар, пешкешар ва конвертар тувбиинди лишанлу гъапIнийи.
Табасаран, лезги ва азербайжан сягьнайин лайикьлу артистари мяълийир, ялхъвнар апIури, тамашичйири аьшкьлуди ва гьевеслуди гурлу гарччлар йивури, серенжем аьхирихъна гъафнийи.
