Гьарсар касдин уьмрин заан вая кьялан пишекарвали важиблу роль уйнамиш апIура. Ктабгъу пише фукьан кIваз хуш вуйиб вая ужуб гъабхьиш, гьаддикан инсандин бахтлу ва берекетлу уьмурра асиллу шула. Гьаддиз пише ктабгъруган, бегьем фикир дапIну, му месэлайихьна дикъатлуди янашмиш духьну ккунду. Аьхиримжи вахтна интернетдиъ фуну жюрейинра мялуматар гъадагъуз мумкинвалар айивализ лигну, му месэла гьарсар касдихьан рягьятди гьял апIуз шулу.
ЦIиб улихьна йисари инженервалин цирклин пишйириз игьтияж лап цIибтIан адар кIури, ебхьуйи. ИкибаштIан, думу улхбар бина ккайидар дайи. Хъа гьясил апIбан цирклин саб фицибкIа ляхин-кар гъудубгъиш, мисалназ, электроэнергетикдин ляхин, думу касдиз вуздин экономикайин вая юриствалин образование гъадабгъуризтIан артухъ маважиб кайи ужуб ляхниъ дийигъуз мумкинвалар а. Ихь республикайиъ, бязи вузарихь тевиган, бинайин мюгькам образование туврайи ва ужудар пишекрар гьязур апIурайи колледжар, училищйир ва техникумар а. Гьаддиз дурарихьна гьякь аьгъдарди вижнасузди янашмиш махьанай.
Мидланра гъайри, мялуматарин технологйирин цирклиан (IT циркил) пише гъадабгъиш, яшамиш хьуз гьииди шулу, сабпну аьхю пулар гъазанмиш апIуз шулу, кIуру жюрейин гафарра ерхьурахьуз. Амма, деврин гьякьикьатди улупурайиганси, му цирклин пишекрарин рынок бегьемди абцIна. Ва, мисалназ, ухьу IT циркил ва тикилишчивалин циркил тевиш, кьюбпибдиз аьхиримжи йисари ляхнин йишварин игьтияж артухъди а. ИкибаштIан, мялуматарин технологйирин цирклиъ заан дережайин пишекарвалин инженераризра игьтияж аьхюб ву, ва дурариз ужуб маважибра тувра. Хъа дицир пишекар хьуз хайлин йисар лазим ву. Гьаддиз программист вая дидиз ухшар вуйи жара пише ктабгъайиз, сифте бегьемди фикир апIинай.
Гуманитарный циркликанра кьюб гаф пуз ккундузуз. Гъийин жигьилари гуманитарный цирклин хайлин пишйириъ гъазанжар артухъ апIудар кIура. Ав, дурар гьякь вушул. Филолог вая тарихдин дарсар кивру мялимдин пише гъадабгъу касдиз аьхю маважиб кайи жара ляхин абгуз гъагъиди ву. Гьаддиз гъи хайлин мялимар, бицIидар имтигьнарихьна гьязур апIури, пулихъ репетиторвал гъабхуз мажбур шула. Гьацира гъийин девриъ гуманитарный сяняаьтарин цирклиъ гележегдиз ужудар мумкинвалар туврайи цIийи пишйир ачмиш апIура. Дурарикан вуди социальный антрополог, жямяаьтлугъдихъди ляхин гъабхру пишекар ва гь.ж. улупуз шулу.
Къайд апIуз ккундузуз, деврин зегьметнан рынокди чан гъурмиш хьпан саягъ бицIи вахтнан арайиъ бинайиан гьюдюхюри шулу. Гьаддиз гележегдин пише ктабгъруган, дикъатлуди фикир апIинай, абйир-бабарин теклифарихъ хъебехъай. Урхуз наан гъягъюруш ва фуну пише ктабгъуруш вуйи фикрар апIруган, шахматариъси, саб гам улихь хьади ккунду. Ичв уьмур хъуркьувалинуб хьуз фикир, гъалатI даршлуси, гъи дапIну ккунду.
