Улихьна йигъари Хив райондин ЦIудухъ гъулан мектебдин бинайиин хусуси метлеб айи дявдин операцияйиъ кечмиш гъахьи, гьюжум апIру дестейин взводдин командир Ильгьам Гьясановдиз гьюрматнан тахта ачмиш апIбан серенжем кIули гъубшну.

 

 

Серенжемдиъ Хив райондин кIулиъ айи Ярмет Ярметов, РД-йин Халкьдин Собраниейин депутат Расим Гьяжиагъаев, Агъул ва Хив районарин военный комиссар Сулейман Гьюсейнов, гъуларин поселенйирин кIулиъ айидар, мектебарин директорар, гъуландар ва майил-мадатар иштирак гъахьну.

Ярмет Ярметовди дирбаш ва фидакар эскер тербияламиш гъапIу Ильгьам Гьясановдин абйир-бабариз чухсагъул мялум гъапIну.
«Ильгьам Гьясановди ихь бицIидарин ислягь гележег бадали чан уьмур тувну. Гьамцдар дирбаш ва кIубан игитари, азадвал уьбхюри, уьлкейихьна, багъри бицIи ватандихьна чпин ккунивал улупура. Думу ихь юкIвариъ уьмурлугдиз гъузди», – гъапну райондин главайи.

Расим Гьяжиагъаевди уч духьнайидариз хусуси метлеб айи дявдин операцияйиъ ихь эскрари Донбассдин цIийи рес-публикйир уьрхбан женгариъ вари мумкинвалар ва кьувватар ишлетмиш апIурайивал кIваин гъапIну ва Ильгьамдин багахьлуйириз сабур ва гьиссарин кьувват ккун гъапIну.

Мектебдин мялимарра, багахьлуйирра удучIвну улхбалан кьяляхъ, ЦIудухъ гъулан мектебдиъ урхурайидари гъийиху эскрарин гьюрматназ бахш дапIнайи шиърар гъурхнийи.
Гьясанов Ильгьам Пирмурадович мобилизация мялум гъапIган чан хушниинди хусуси метлеб айи дявдин операцияйиъ иштирак хьуз гъушну. Думу «Вагнер» ЧВК-йин гьюжмиз гъягъру взводдин командир вуйи. Ильгьам Донецкдин Халкьдин Республикайин Артемовск шагьур азад апIбан женгариъ майин 11-пи йигъан йивну гъакIну.
Думу «Дирбаш’вал улупбаз лигну», «Соледар гъадабгъбаз лигну», «ДНР азад апIбаз лигну» ва хайлин жара медалариинди ва орденариинди, хъа гьацира «Вагнер» ЧВК-йин хусуси медалариинди лишанлу дапIнайи.

Игит Ильгьам Гьясановдин аьхиратдин хал ужуб ибшри. Багарихьди учу дугъан майил-мадатдихъди гюрюшмиш хьуз планламиш дапIнача.