Дагъустандин Госавтоинспекцияйин сайтдиъ тувнайи мялуматариинди, гъябгъюрайи йисан майин 29-пи йигълан 5-пи июндиз республикайин рякъяриъ 34 ДТП гъахьну. Думу аварйириъ 9 кас гъийихну ва 60 касдиз зийнар гъахьну. Дурарин гьисабнаъ 10 бицIирра а. Хъа 5-пи июндихъан 25-пи июндиз гъахьи аварйириъ 15-сан инсан гъийихну.

 

 

Аварйирин аьхюбсиб пай дюшюшариъ тахсиркрар машин хъапIрайидар ву. Дурар гъаншарди гъюрайи маши-нарин рякъюз удучIвура, рякъюъди гъягъюз тяйин дапIнайибтIан зарбди машин хъапIра, пиянди рулихъ деъра ва гьацдар жара хайлин тахсиркарвалар апIура.

Мициб пашман аьгьвалат арайиз дуфнайивал 21-пи июндиъ гъабхьи вари Дагъустандик гъалабулугъвал кипу, аьхю аварияйи нубатнан ражари субут гъапIну.

Силисар гъахурайи гъуллугъчйирин мялуматариинди, 21-пи июндиъ «Кавказ» трассайиин Къизлар райондин Новокахановское гъулан багахь «Москва – Хасавюрт» рейснаъ айи автобус, «Тойота Камри» ва гъагъар гъахру аьхю КамАЗ машинар саб-сабдихъ гъивну. ДТП-йин натижайиъ 9 кас гъийихну, дурарин арайиъ кьюр бицIирра а, хъа 20-рихьна инсанариз жюрбежюр гъагъи-шнан зийнар гъахьну. Тахсир, судди тяйин гъапIганси, машин хъапIбан ихтиярарихъ мягьрум дапIнайи «Тойота Камри» машиндин рулихъ деънайи Шамил Мягьямедовдин гъабхьну. Думу пиянди ади, улихь хьайи автобус ухди хъидипну гъягъюз кIури, гъаншарди машинар гъягъру рякъюз удучIвну ва машна-машди гъюрайи КамАЗ машиндихъ гъивну. Гъагъар хру машиндихъ хъайир йишв’ин йикIуру, хъа дугъан КамАЗ автобусдихъ гъивнийи…

Улихьнаси «Тойота Камри» машиндин эйсийиина, РФ-дин УК-йин 264-пи маддайиз асас вуди, ихтияр адарди ва пиянди машин хъапIри гъахьивализ, рякъюъди машин хъапIбан къанунар чIур апIбаз лигну, уголовный дело гъитIибкIнийи.

«Узу ихтияр айи йишвахь автобусдин улихьинди гьутIурччвурайза. КамАЗди узуз рякъ тувундар ва улихь гьутIурччвувал бегьемди аьхирихъна хуз гъабхьундайзухьан», – ктибтнийи силис гъабхурайидариз аварияйин тахсиркри. Дугъ’ина нубатнан уголовный дело гъитIибкIна.