23-пи июлиъ «Вагнер» ЧВК тешкил гъапIу Евгений Пригожинди Урусатдин оборонайин министерствойик хусуси военный компанияйин далу терефнаъ ерлешмиш духьнайи лагерариз яракьдиан йивбан тахсир кипну ва, мидиз мажбури вуди жаваб тувурза кIури, гаф тувну. Чан терефнаан оборонайин министерствойи Пригожиндин аьрз бина ккадрубси ва чIуру кьаст ади алаувалси гьисаб гъапIну. Хъа 24-пи июндиъ Евгений Пригожинди Ростов шагьриз гъягъру-гъюру рякъяр ЧВК-йин эскрари хъяркьнайиваликан ва душваъ айи военный дараматар, гьадму гьисабнаан Кьибла военный окрудин штабра, аэродромра, дурари чпин гюзчиваликкна гъадагънайиваликан мялум гъапIнийи. «Вагнер» ЧВК-йин кIулиъ айири къанунсуз наразивал улупувал гьамци ккебгънийи.

 

 

Мициб аьгьвалат арайиз гъювалихъди аьлакьалу вуди Урусатдин саб жерге регионариъ террориствалин гьяракатариз аькси уьлчмйирра кьабул гъапIнийи. Киш йигъан гвачIнинган Урусатдин Президент Владимир Путин уьлкейин вари ватанагьлийирихьна илтIикIнийи. Чан илтIикIбаъ дугъу гьамусяаьт Урусатди чан гележег бадали гъагъи женгар гъахурайиваликан, ухьуз аьксиди Ригъ алабхъру терефнан гьюкуматари чпин военный, экономикайин, мялуматарин ва гьацдар жара вари кьувватар ишлетмиш апIурайиваликан гъапнийи.

«Му дявди, ихь халкьдин кьадар-кьисмат гьял апIурайи вахтна, вари кьувватарин сатIивал, сабвал, сигъ’вал ва жавабдарвал тIалаб апIура. Ухьу айтIанди пуч апIбан бадали, чIатан душмни ишлетмиш апIуз мумкин вуйи ва ишлетмиш апIурайи фицдар вушра гьюжатар, ухьу зяиф апIурайиб вари гъирагъдизди ккатIабхьну ккунду.

Гьаддиз ихь жямяаьтлугъ швурариз пай апIбан гьяракатар – му гьякьикьатдиъ жвуван халкь ва гьамусяаьт дявдиъ айи женгнан юлдшар масу тувувал ву. Му ихь уьлкейин ва ихь халкьдин йирфариз йивувал ву», – къайд гъапIну чан илтIикIбаъ Президентди.

Дугъу гьацира ихь халкь ва гьюкумат айтIан хаинкарвалихьан ва фицдар вушра къурхулуваларихьан уьрхруваликан, хъа тахсиркрари чпин къанунсуз гьяракатар гъахбахъан тялукь жаваб тувруваликанра гъапнийи.
Урусатдин генеральный прокуратурайи, хилиъ яракь ади уьлкейиъ гьюкмиз аьксиди гъудужвувал тешкил апIбаз лигну, ЧВК-йин кIулиъ айириина уголовный дело гъитIибкIуру, хъа ФСБ-йин жямяаьтлугъ аьлакьйирин центри думу тешкилатдин эскрарикан Пригожиндин къанунсуз буйругъар тамам дарапIуб ва думу дисуб тIалаб апIуру.

Урусатдин вари политикари, машгьур касари, вари регионарин главйири, жюрбежюр жямяаьтлугъ ва военный тешкилатарин кIулиъ айидари, аьдати касари, «Вагнер» ЧВК-йин къанунсуз гьяракатар тянкьид апIури, чпи Владимир Путиндин тереф уьбхюрайиваликан мялум гъапIну.

Гъи ихь уьлкейи 50 гьюкуматди яракьдихъди, дяви апIру эскрарихъди, пулихьди ва жара дакьатарихъди булди тямин апIурайи гъаних миллетчйирихъди гизаф ифи удубзру женгар гъахурайи вахтна, яракьра хьади наразивал улупуз удучIвувал душмнин терефназ гъягъювалик гьисаб шула. ЧВК-йин кIулиъ айири фагьумсузди кIули гъуху къурхулу ва алчагъ гьяракатар, дугъахъ хъугъну, жюрэтлуди ва дирбашди женгар гъахури, Ватан бадали чпин жанар фида гъапIу эскрар масу тувувалра ву.

Евгений Пригожинди чан наразивалар улупбан, жвуван маракьар, хайир бадали кIули гъуху гьяракатари ва учв варитIан заанди дисували сабцIибсан имийиш гизаф ифи удубзру гъярхьуваларихьна, чвуччву чве йивну йикIру дявдихьна хуб мумкин вуйи. Ифи удубзуз гъидритувал заан метлеб вуди, арайиз дуфнайи учIру аьгьвалат саламатвалин къайдайиз илтIибкIбан бадали, Белоруссияйин президент Александр Лукашенкойин кюмекниинди Евгений Пригожиндихъди мясляаьтнан йикьрар апIбан гьякьнаан улхбар кIули гъухнийи.

«Кьюрид президентари аьгьвалат къайдайиз хпаъ арачивалин ляхин Лукашенкойи апIбан гьякьнаан йикьрар гъапIну. Александр Григорьевич Пригожиндихъди таниш вуди 20 йистIан артухъра ву, ва му дугъан терефнаан гъапIу ва Президент Путиндихъди албагу теклиф вуйи. Му ляхин гъабхувализ учу Белоруссияйин президентдиз чухсагъул мялум апIурача. Натижайиъ, учвуз аьгъюганси, му аьгьвалат, талаф хьувалар ва читинвалар адарди, къайдайиз хуз гъабхьну», – гъапну РФ-дин Президентдин пресс-секретарь Дмитрий Песковди.

Дугъу къайд гъапIганси, гъийитIу йикьрариз асас вуди, «Вагнер» ЧВК-йин эскрар чпи муганайиз ерлешмиш дапIнайи лагерариз кьяляхъ гъягъиди. Дурарикан гележегдиъ военный гъуллугънаъ гъузуз ккунидари РФ-дин оборонайин министерствойихъди контракт йибтIиди. Му анжагъ наразивал улупбан гьяракатнаъ иштирак дархьи эскрарин пайназтIан тялукь дар. Хъа имбуну эскрарикан улхуруш, дурари дявдиъ гъазанмиш гъапIу ихтибарвализ, гьюрматназ ва фронтдиъ улупу игитвализ лигну, дурарин кьяляхъра гьич фужкIа хъергидар. Евгений Пригожиндин гьякьнаан гъитIибкку уголовный дело хъябкьди, хъа думу учв Белоруссияйиз удучIвну гъягъиди.

«Вагнер» ЧВК-йи наразивал улупбан му гьяракатари гизаф суалар арайиз гъюз гъитну, амма гьелелиг дурариз, анжагъ сасдар касарин чиб-чпикан кадагънайи фикрарна гьисаб апIбартIан гъайри, жара якьин жавабар адар. СабцIибди вахт гъубшиган, варибдикан мялум хьибдихьуз. Хъа гъи Урусатдиъ бедбахтвалин дюшюш хьуз гъидрибтди, ифи удудубзди гьаму учIру месэла гьял апIувал ихь уьлкейин улихь-кIулихь хьа-йидарин зурба хъуркьувалси гьисаб апIуз шулу.
Шиклиъ: «Вагнер» ЧВК-йин эскрар Ростов шагьрин кючйириъ.