Июлин 3-пи йигъан Дагъ. Огни шагьрин глава Жалал Аьлирзаев, гъябгъюрайи йисан мектеб заан аьгъювалариинди ккудубкIу баяр-шубарихъди ва мектебарин директорарихъди гюрюшмиш гъахьну.

 

 

2022-2023-пи урхбан йисан Дагъ. Огни шагьрин мектебарин 21 выпускник гъизилин медаларин сагьибар духьна.

Гьадму гьисабнаан шагьрин 1-пи нумрайин мектебдиан 6 кас, 2-пи нумрайин мектебдиан 5 кас, 4-пи нумрайин мектебдиан 3 кас, 3-пи, 5-пи ва 7-пи нумрйирин мектебариан кью-кьюр кас ва 6-пи нумрайин мектебдиан 1 кас гъизилин медалариз лайикь гъахьну.

Му шадвалин серенжемдиз уч духьнайи мектебарин директорарихьинди ва баяр шубарихьинди Жалал Аьлирзаев илтIикIну. «Гъи учву гъазанмиш дапIнайи хъуркьувалар учвуз гъюзимбу уьмриъ бакар хьибди. Ихь гьюкуматдин гъюзимбу уьмур учвкан гизаф асиллу хьибди.

Думу заан хъуркьувалар улупбак, икибаштIан мялимарира ва ичв абйир-бабарира аьхю пай кивна. Ужуб образование гъадабгъували ичв кьисматназра тясир апIиди», — гъапнийи шагьрин кIулиъ айири.
Дугъу гьацира думу мектебарин директорариз ва мялимариз жаради чухсагъул гъапнийи. Дугъриданра, бицIир гележегдин уьмрихьна аьхю роль уйнамиш апIурайидар мялим ва думу урхурайи мектеб ву.
Йислан-йисаз хъуркьувалиинди мектеб ккудубкIурайи живанарин кьадар артухъ шулайивалиин ухьу шад вухьа. Дурариз ягъурлу рякъ ибшри.