Июлин сабпи йигъланмина башламиш дапIну, саки саб гьяфтайиъ Дагъустандиъ вари халкьарин фольклоринна аьдати культурайин «Дагълуйир» фестиваль кIули гъябгъюра.

 

 

Фестивалиъ иштирак хьуз республикайиз Азербайжан, Беларусь, Монголия, Кьибла Осетия уьлкйириан; Калмыкия, Хакасия, Башкортостан, Адыгея, Карачаево-Черкесия, Кабардино-Балкария, Донецк-дин Халкьдин, Луганскдин Халкьдин республикйириан фольклорин коллективар гъафну. Дурари ва Дагъустандин фольклорин 50-тIан артухъ коллективари республикайин вакилар ва хялар халкьдин жюрбежюр аьдатарихъди, фольклорихъди, сяняаьткарваларихъди таниш гъапIнийи.

«Дагълуйир» фестивалин программайин дахилнаъди республикайин шагьрариъ ва хайлин районариъ, Дагъустандин халкьдин шаир Расул Гьямзатовдин 100 йис хьпан юбилейиз бахш дапIну, «Урусатдин сес» машквар, «Халкьарин аьдатар» ччвур тувнайи концерт, вари халкьарин «Каспий – дуствалин гъирагъ» фестиваль, «Дербент – цивилизацйирин ужагъ» халкьдин яратмишарин концерт, «Пягьливнар» фестиваль, культурайин ва фольк-лорин месэлйириан гергми столар, конференцйир кIули гъушну.

Тамашичйириз асас вуди Беларусь Республикайин «Лирники» халкьдин ансамблин, Монголияйин дуфнайи ялхъвнарин коллективдин, Кафари Осетия – Аланияйин «Апцырух» халкьдин ансамблин сягьнйир кьабул гъахьнийи.

«Дагълуйир» фестивалин серенжемариъ ва мяракйириъ иштирак шулайи саки вари фольклорин коллективарин бажаранлу устадари чпин культурйириан, кюгьне халкьарин сяняаьткарвалариан мастер-классарра тешкил гъапIнийи.

Республикайин халкьдин яратмишарин хулан пресс-гъуллугънаан мялум гъапIганси, «Дагълуйир» ва думу фестивалин дахилнаъди кIули гъуху жара серенжемар РФ-дин культурайин министерствойи, РД-йин культурайин министерствойи ва Республикайин халкьдин яратмишарин хулу тешкил гъапIну.