Украинайиъ хусуси метлеб айи дявдин операция ккебгъхъанмина Табасаран райондиан хайлин эскрар дявдин женгариъ иштирак шула. Чпин хизанарикан, Ватан уьбхбакан, дяви гъалибвалиинди ккудубкIну жвуван уьлкейиз кьяляхъ хъадакну гъюбкан фикрар кIваъ ади, дурари душмнихъди дяви гъабхура. Хъа дурарин хизанари, Аллагьдиз дюъйир апIури, дугъкан чпин багахьлуйир сагъ-саламатди хулаз гъюз гъитувал ккун апIура. Гьамусяаьт хусуси метлеб айи дявдин операцияйиъ иштирак шулайи эскрарин арайиъ ихь ватанагьли Аьлим Насировра а.
Аьлим Малларажабович Насиров 1981-пи йисан 23-пи январиъ Табасаран райондин Цухтигъ гъулаъ Малларажабоварин хизандиъ бабкан гъахьну. 1998-пи йисан Цухтигъ гъулан кьялан мектеб ужудар аьгъювалариинди ккудубкIну, Аьлим Насировди 1999-2001-пи йисари Урусатдин Яракьлу кьувватарин жергйириъ гъуллугъ апIуру. Чаин али буржи тамам апIбалан кьяляхъ, дугъу хизанра ккебгъру. 2006-пи йисан контрактдиин къул дизигну, Аьлимди Чечен Республикайиъ айи Калиновский станцияйиъ ерлешмиш дапIнайи дявдин частнаъ ляхин апIуз хъюгъру. 2014-пи йисан думу Украинайиъ кIули гъя-гъюри гъахьи дявдин гьядисйириъра иштирак гъахьну, ва женгариъ улупу гьунарариз лигну, думу Суворовдин медаль тувбиинди лишанлу гъапIну.
Украинайиъ хусуси метлеб айи дявдин операция кIули гъабхуз хъюгъиган, Аьлимди, сифте йигъариланмина Запорожский областдиъ ва гьацира жара йишвариъ дявдин гъати йивбариъ иштирак шули, разведкайиъ гъуллугъ апIури гъахьну. Дявдин женгариъ чан жан гьяйиф дарди, гъаних душмнариз аьксиди удучIвури, дурарин дявдин техника чIур апIури, зийнар гъахьи ихь эскрар дявдин цIигъян гъядягъюри, дурариз медицинайин сабпи кюмек туври, Аьлим Насировди учв Ватандин лайи-кьлу бай вуйиб субут гъапIну. Гьаддиз думу, жюрэтлувал улупбаз лигну, медаль тувбиинди лишанлу апIуру.
Гьамусяаьт ихь дирбаш ватанагьли, дявдин женгариъ чаз гъахьи гъагъи зийнар сагъ апIури, госпиталиъ дахъна. Дугъан нервйириз ва гьацира мухриз, хилиз, гъюниз, улиз зийнар гъахьнийи.
«2006-пи йисхъан мина, сержантдин звание ади, контрактдин бинайиинди Ватандиз гъуллугъ апIураза. Йиз Ватан узуз ккилибгурайи вахтна, узхьан гъирагъдиъ гъузуз гъабхьундайзухьан. 2022-пи йисан 24-пи апрелиан 20-пи майиз узу Украинайиъ кIули гъябгъюрайи хусуси метлеб айи дявдин операцияйиъ иштирак гъахьунза. Йиз фикриинди, дявдин гъуллугъназ дирбаш’вал кайидар, читинвалариккан кIул ккададабгърудар, жарариз уж’вал апIуз гьязур вуйидар душну ккунду. Ватан бадали, йиз хизан бадали, миди вуйи наслар бадали йиз жан фида апIуз гучIурадарзуз, я думу гьяйиф дарзуз. Ватандин маракьар уьрхювал йиз пише вуйиз, ва думу пише ктабгъувалиин сад йигъанкьа швумал гъахьундарза. Узухъди хусуси метлеб айи дявдин операцияйиъ иштирак шулайидар, чпин улихь дивнайи месэлйир, Ватандин улихь чпин пак буржи тамам апIури, гъалибвал гъадабгъайизкьан душмнихъди женгар гъахуз гьязур ву. Узкан кIуруш, душмниз аьксивал улупури, сарди женгназ удучIвру вахтарра алахьунзуз. КIваъ Ватан, ислягьвал уьбхбакан фикрар ади, душмнин дявдин техника пуч апIури гъахьунза. Гьелбетда, му дяви ву, ва дявдиъ рягьятди ва ужуди шлуб дар. Амма ихь вазифа – фу дапIнура душмниин гъалиб хьувал ву», – ктибтура Аьлим Насировди.
Табасаран игит балин хизандиъ адашна дада, хпир Муминат ва юкьур гюрчег риш а. Дурар, кIвак гьарган гъалаб кади, йигъ-йишв дюъйир апIури, дугъаз ккилигури гъахьну.
«Аьлим дявдиз гъушиган, йиз юкIв убгури, йигъар-йишвар гьаунза. 15-пи апрелиан 7-пи майиз думу зат аьлакьайиз удучIвури гъахьундайи. Гьаму саб ваз, кIвак гъалабулугъвал кабхъну, йишвну нивкI адарди, Аьлимдин гьялнакан жарадарихьан гьерхри гъубшнийиз. Хъасин вахт-вахтарик дугъу «ужуди вуза, фикир мапIан» бикIури гъахьну. Душваъ шулайи гьядисйирикан ктибтуз ва дявдин сир ачмиш апIуз дурариз ихтияр ади гъабхьундар, гьаддиз Аьлимди чан гьялнакантIан учуз хабар тувурдайи», – кIура Муминатди.
Аьлим Насиров, дугъриданра, дирбаш, дявдин дустарин ва командова-ниейин терефнаан гьюрмат айи эскрарикан сар ву. Гьамцдар кIубан баяр ухьуз имиди, гучI хьуз ляхин адар.
Гъит наан ашра, ихь эскрар Аллагьди уьрхри, чпиз ккилигурайи хизанариз сагъ-саламатди ва гъалибвал хьади хъадакну кьяляхъ гъюри.