4-пи июлиъ Каспийск шагьриъ ерлешмиш дубхьнайи AZIMUT гос-тиницайин конференцйир гъахру залиъ Кафари Кавказдин федеральный округдин гъулан мяишатдин цирклариан вуйи туризмдихъди ляхин гъабхурайи туроператорарин конференция кIули гъубшну. Дидиъ Государствойин Думайин туризмдин ва туриствалин инфраструктурайин артмиш’валин комитетдин кIулиъ айи Христофор Константиниди, Урусатдин гъулан мяишатдин министерствойин вакилар, республикайин туризмдин ва гъулан мяишатдинна ипIру-убхъру сурсатарин министерствйирин пишекрар, гъулан мяишатдин карханйирин ва туриствалин фирмйирин кIулиъ айидар иштирак гъахьну.
Серенжемдиз гъюрайи хялар кьабул ва къаршуламиш апIбан кьяляхъ, конференцияйиз уч духьнайидарин улихь удучIвну улхбаъ Дагъустандин Правительствойин председатель Аьбдулмуслим Аьбдулмуслимовди гьамци гъапну: «Гъулан мяишатдин туризм артмиш апIуз ич республикайиз хайлин мумкинвалар айич. Гьамусяаьт республикайин аьтрафарикан 80% гъулан мяишатдин цирклариъ ишлетмиш апIура ва республикайин агьалйирин 1/3 пайну гъулан мяишатдиъ зегьмет зигура.
Аьхиримжи йисари Дагъустандиз гъюрайи туристарин кьадар лап гизаф дубхьна. Туриствалин хайлин маршрутар гъулан мяишатдиъ ишлетмиш апIурайи йишварилантина гъягъюра. Республикайиз гъюрайи туристарин сан артухъ хьпахъди сабси, учу респуб-ликайиъ гъулан мяишатдин циркларин туризмра артмиш апIурача, ва му терефнаан ухьу варидари сатIиди ляхин апIбиинра умудлу вуза».
Серенжемдиъ иштирак шулайи дагъустандин туризмдин ва халкьдин сяняаьткарвалин министр Эмин Мердановди къайд гъапIганси, рес-публикайиъ яваш-явашди артмиш шулайи гъулан туризмдин вакилари швнуб-саб цирклариан туристарихъди ляхин гъабхура. Гъулан мяишатдин туризмдик табиаьтдин, жюрбежюр халкьарин ва культурйирин, хурагарин циркларра кахьра.
«Гьамусяаьт республикайиъ артмиш шулайи гъулан мяишатдин туризмдиин юкIв алидар гъягъюрайи маршрутар Гъизилюрт райондиъ айи «Главрыба» комплекс, Салмановарин хизанарин йимишарин «ТIагъру даршлу багъ», Дербент райондин «Анжелина» ООО, Къарабудагъкент райондин ООО «Герей ТЮЗ» агрофирма ва хъана жара йишвар ву. Дина гъафи туристариз балугъар дисуз, дагъустандин нис ва пIялцIикI гьязур апIуз, йимишар утIуз мумкинвал а», – гъапну министри.
Конференцияйин иштиракчйир саб Дагъустандиъ ваъ, хъа вари Кафари Кавказдиъ гъулан мяишатдин туризм артмиш апIбан месэлйирикан гъулхнийи.
Серенжемдин кьяляхъ республикайиз дуфнайи хялар Чиркейдин шид уьбхюрайи йишв’ ина катерариъди яртуз хъади гъушнийи.
«Гъи Дагъустандиз конференция-йиз гъювал ва гьамушв’ин яртувал йиз гьаргандиз кIваинди гъузди. Йиз фикриинди, Урусатдин регионарикан варитIан мани ва ужуди хялар кьабул апIру регион Дагъустан ву. Гьаддиз мина гъювал ихь уьлкейин гьарсар агьалийин буржиси гьисаб апIурза», – аьлава гъапIну конференцияйин иштиракчи, Тверской областдин туризмдин министрин заместитель Надежда Выскубовайи.
