Цци Дагъустандин мектебарин 11 агъзуртIан артухъ выпускникарикан 1600 урхурайидари имтигьнар заан баллариз тувну, 29 ученикди саб предметдиан, хъа Табасаран райондин ТIаттил гъулан мектеб ккудубкIу Гьаваханум Мягьямедовайи (шиклиъ) кьюб предметдиан 100 балл гъадабгъну.

 

Республикайин мялуматар тартиб апIру центрин пересс-гъуллугънаан къайд гъапIганси, Дагъустандиъ гьюкуматдин имтигьнар гъахру 64 пункт гьяракатнаъ айи. ЕГЭ тешкил апIбиин 5135 пишекар машгъул духьнайи.

Баяр-шубари варитIан заан баллар гизафси урус чIалнан имтигьниан гъадагънийи. Гьаци ЕГЭ-йиан 100 балл гъадагъу 30 касдикан му имтигьян 13 касди 100 баллиз тувну. Гьацира 9 касди – химияйиан, 4 выпускникди – биологияйиан, 1-ри – физикайиан, 1-ри – математикайиан, 1-ри – литературайиан, 1-ри – информатикайиан ва ИКТ-йиан.

13-пи июлиъ ЕГЭ- йиан 100 балл гъадагъу выпускникариз, олимпиадйирин гъалибчйириз ва дурарин мялимариз РД-йин Глава Сергей Меликовди 100 агъзур манатдин сертификатар тувну.
Му премия республикайин Главайи шубуд йис улихьна тяйин гьапIуб вуйи. Дидхъан мина дагъустандин бажаранлу бицIидари му премия гьар йисан гъадабгъура.