Улихьнаси, 7-пи июлиъ, Хизандин, ккунивалин ва вафалувалин йигъан Табасаран райондин глава Мягьямед Къурбанов райондиъ ужуб гьюрмат гъазанмиш дапIнайи кьюб хизандиз хялижв гъахьну ва думу кюлфетарин эйсйириз «Вафалувализ ва ккунивализ лигну» медалар ва жара пешкешар багъиш гъапIну.
Сифте вуди райондин глава агьал-йирин яшайишдин ихтиярар уьрхру управлениейин гъуллугъчйирихъди сатIиди Дагъни гъулан Аьбдуллаеварин хизандиин улукьнийи.
Нариман ва Калимат Аьбдуллаевар сатIиди яшамиш шули магьа 31 йис ву. Дурари 6 велед тербияламиш гъапIну. Аьбдуллаеварин 4 бай СВО-йин иштиракчйир ву, дурарикан санур, Ариф Аьбдуллаев, гьяйифки, дявдин женгариъ кечмиш гъахьну. Арифдин шубур велед ими. Абана баб чпин худлар шлубкьан ужуб гъайгъу зигури тербияламиш апIуз чалишмиш шула. Хизандин кIулиъ айи Нариман Аьбдуллаевди гъапиганси, му хизандин баяр бицIиди имиди гъудуркьу жиларси вердиш апIури гъахьну. Дурариз нумуна дугъан адаш, баярин аьхю аба, МВД-йин ветеран, ватанди чан улихь дивнайи буржи тамам апIурайи вахтна кечмиш гъахьи Рамазан Аьбдуллаев ву. Хизандин аьдатар, дурарикан вуди яшлу касариз гьюрмат апIувал, хизандин, багъри гъулан ва кIулди вари ватандин улихь жавабдарвал гьисс апIувал ва жарадар му хизандиъ мюгькамди уьрхюра ва аргъаж шулайи насилра ватанпервервалин рюгьнаккди тербияламиш апIура.
Мягьямед Къурбановди Нариман ва Калимат Аьбдуллаевариз дурарин багъри веледар СВО-йиан сагъ-саламатди гъювал, хизандиъ гьаммишан мясляаьт ва саламатвал, девлет ва хушбахтвал хьувал ккун гъапIнийи.
Дагъни гъул’ан райондин глава Хюриккна Хачмазоварин хизандиз гъушну. Му хизандин эйсйир вуйи Ризахандиз ва Бариятдиз 4 велед а. Дурар сатIиди яшамиш шули 41 йис ву. Хачмазоварин хизан уьмрихьна вуйи лигбарииди, зегьмет зигуз аьшкь айивалиинди, хъуркьувалар гъадагъуз кьувват сарф апIувалиинди жарадарихьан тафавутлу шула.
Хачмазоварин хизандиз «Вафалувал ва ккунивал уьбхювализ лигну» медаль туврайи вахтна Мягьямед Къурбановди гъапиганси, му машквар къайд апIури гьеле 10 йистIан дар. Диди хизандин багьалу милли аьдатарин ва савкьатарин ижмивал ва нюкгьин вафалувалин мюгькамвал субут апIура. Вафалувалин ва ккунивалин медаль хайлин йисари чпин хизандин мюгькамвал, ккунивалин аьлакьйир уьрхюрайи ва сар-сарихьна хатур-гьюрмат ва гафнан сабвал айи хизанариз туври аьдат ву.
«Табасаран хизанар гьарган чпин мюгькамвалиинди тафавутлудар вуйи. Гележегдиъра ихь бицIи насил хизандин усуларин милли багьалувалар, аьдатар улупури тербияламиш дапIну ккунду», – гъапнийи Мягьямед Къурбановди.
