Террористари уьмрихъ мягьрум апIбан кьяляхъ, Урусатдин Игит кIуру ччвур туву Мягьямед Нурбагьандовдин рюгьназ бахш вуди, 10-пи июлиъ Мягьячгъала шагьриъ дугъаз дивнайи гюмбет ачмиш гъапIну.

 

 

Вари ихь уьлкейиз машгьур гъахьи «Ляхин апIинай, чвйир!» гафарин автор Мягьямед Нурбагьандов 7 йис улихьна, ляхнихьан азад йигъан чан чвйирихъди рягьятвал гъадабгъури, ярквраъ айи вахтна, террористари гъидиснийи. Дурари сифте Мягьямеддин эмдин бай Аьбдурашид йивну гъакIнийи. Хъасин, яракь алапIну, Мягьямед Нурбагьандовдикан чан багахьлуйириз, полицияйин жергйириъ милиханай, пуб тIалаб гъапIнийи. Полицияйин вакил, «Ляхин апIинай, чвйир!» кIури, чан гъарашугъар вуйи МВД-йин пишекрарихьна илтIикIну. Чпи тIалаб гъапIубдиз аькси гафар гъапиган, гъачгъари Мягьямед ра йивну гъакIнийи. Гьаддихъанмина хайлин вахт дубшнашра, Игитрин гьюрмат уьбхюри, гьар йисан вари Урусатдиъ дугъу гъапи гафарин лишниккди жюрбежюр акцйир ва серенжемар кIули гъахура.

Игитриз гюмбет ачмиш апIбан серенжемдиъ Дагъустандин Глава Сергей Меликовди, Урусатдин Государствойин Думайин депутат Султан Хамзаевди, Игитрин адаш Нурбагьанд Нурбагьандовди ва хайлин жара гьюрматлу хялари иштирак’вал гъапIнийи.
Серенжемдиъ уч духьнайидарин улихь удучIвну гъулху республикайин Главайи гъапиганси, 2016-пи йисан июлин вазлиъ террористарихъди ва экстремистарихъди вуйи женгарин лишан Мягьямед Нурбагьандов гъахьну.

«Гъи ухьу Урусатдин Игит, офицер Мягьямед Нурбагьандовдиз гюмбет ачмиш апIурахьа. Асас вуди гьадму себеб духьну, Дагъустандиъ ва Кафари Кавказдиъ йисариинди тахсркарвалар апIури гъахьи террористарин жини тешкилатар терг гъапIну. Инсанар гучI дарди яшамиш хьуз хъюгъну. Дугъан аьхиримжи «Ляхин апIинай, чвйир!» кIуру гафар, вари Урусатдилан илтIикIну, погонар али гъуллугъчйиризси, вари ватанпервер касариз девиз гъахьну. Ихь ватандин ислягьвал ва саламатвал уьрхюри, гъуллугънан вазифйир тамам апIурайи вахтна чпин жанар фида гъапIу ватанагьлийирин улихь гъи ухьу кIул ис апIурхьа», – гъапнийи Сергей Меликовди.
Мидланра гъайри, чан удучIвну улхбаъ республикайин Главайи къайд гъапIганси, Мягьямед Нурбагьандовди гъапи гафар девизси гьисаб дапIну, гьамусяаьтра ихь уьлкейин жюрбежюр миллетарин агьалйири, гъюн гъюниъ йивну, чвйириси, Ватан Украинайин миллетчйирихьан уьбхюра.
Чан улхуб республикайин Главайи «Ляхин апIурача, чве!» гафариинди ккудубкIну.