Улихьна йигъари «Дагестанская правда» редакцияйин конференцйир гъахру залиъ Дагъустандин МЧС-дин министрин заместитель Муслим Муслимовдихъди гьюлер, даграр, нирарикк жикбан фаслихъди аьлакьалу месэлйириз бахш дапIнайи пресс-конференция кIули гъубшну.

 

 

Конференция ачмиш апIури, министрин заместители мялум гъапIганси, гьюлер, даграр, нирарик жикIбан фасил ккебгъхъанмина республикайиъ 14 кас штукк ккахьну гъийихну. Гьадрарикан 3 яшар бегьем дархьи бицIидар ву.

«Асас вуди штукк ккахьрайидар гъулариан гьюлик жикIуз гъюрайи республикайин агьалйир ву. Гьюликкси, сирнав апIуз агъдарди, нирар-даграриккра ккахьрайидар а. Мисал вуди гъадабгъиш, улихьна йигъари Къизилюрт райондиъ Сулак нирик жикIурайи вахтна, 16 йисан яшариъ айи живан штук ккахъну, бедбахтвалин дюшюш арайиз гъафну.
Гьаддиз, республикайин агьалйирихьинди ва гъюрайи хяларихьинди илтIикIну, пуз ккундузуз, анжагъ гьязурди ади гьисабназ гъадагънайи, кюмек апIру инсанар ва медицинайин бригадйир хьайи гьюлин, нирарин гъирагъарихътIан мижикIанай», – гъапну Муслим Муслимовди.

Дугъу мялум гъапIганси, штукк бедбахтвалин дюшюшар гьюлиин гизаф лепйир али вахтна вая пиянди ади жикIуз кучIвувалиан, абйир-бабари штук кучIвнайи бицIириз фикир тутрувди гъитувалиан ва гьюлерин гъирагъарихъ гьуркIну къутIармиш апIру касар хътрувалиан арайиз гъюра.
«Гьаму йисан гьюлер, даграр, нирарикк жикIбан фасил ккебгъхъанмина республикайин къутармиш апIрудари гьюлер, нирарик ккахьу 18 кас аьжалихьан гъюрхну. Дурарикан 5 кас яшар бегьем дархьи бицIидар ву.

Республикайиъ 200-тIан артухъ пляжар а, хъа, гьяйифки, вари йишварихьна гьуркIну къутармиш аIру касар адар, ва МЧС-дин гъуллугъчйирихьан вари йишварихь хьуз удукьурадар. Гьаци вушра, дурари Мягьячгъала, Дербент ва Избербаш шагьрарин пляжарихъ гъаравулвал апIура. Амма, гьюлихъ бедбахтвалин дюшюшар арайиз дяргъбан бадали, гьарсаб пляждин ва рягьятвал гъадабгъру базайин кIулиъ айидари ва муниципалитетарин администрацйири, жавабдарвал гъабхувал чарасуз лазим ву», – аьлава гъапIну М. Муслимовди.