Гъубшу гьяфтайин хамис йигъан Дагъустандин Глава Сергей Меликов республикайин мектебарин ЕГЭ-йиан 100 балл гъадагъу выпускникарихъди гюрюшмиш гъахьнийи. Ихь республикайин 29 балина шуру жюрбежюр предметариан ЕГЭ 100 баллиз тувну, хъа гьадрарин арайиан Табасаран райондиан вуйи Гьаваханум Мягьямедовайи кьюб предметдин (урус чIал ва биология) ЕГЭ-йиан 200 балл гъадагъну. Варж баллин сагьибарихъди вуйи гюрюшдиъ республикайин кIулиъ айири уч духьнайи баяр-шубар Дагъустандин дамагъ, абур-асул вуйиваликан гъапнийи.
Урусатдин жара регионариъра Дагъустандин, Табасарандин ад за апIури, ужуди урхурайи ихь дирбаш баяр-шубар гизаф а. Гьадрарикан сар Москвайин областдин Люберцы шагьрин 54-пи нумрайин мектебдин выпускник Марат Мазановра ву. Дугъан ата-бабйир Хив райондин ГъуштIил гъул’ан ву. Марат Мазановди информатикайиан вуйи ЕГЭ-йиан 100 балл гъадагъну. Думу гьамциб мяналу натижайихъди тебрик апIури, улихьнаси дугъу мектебдиъ фици урхури гъахьнуш, думу ЕГЭ-йихьна фила гьязур хьуз хъюгънуш, дугъхьан ЕГЭ туврудариз фицдар теклифар тувуз шулуш, телефондиан сюгьбат гъубхунза. Думу сюгьбат жикъиди исихъ туврача.
«Узу мектебдиъ гьаммишан ужуди урхуз чалишмиш шули гъахьунза. Йиз метлеб — саб дарснаан ваъ, вари дарсариан ужудар натижйир гъадагъувал вуйиз. Хъа варитIан ужуди удукьру дарсар — математика, информатика ва физика вуйиз. Мектебдиъ урхурайи вахтна кми-кмиди олимпиадйириъра иштирак шули гъахьунза. Хъа асас фикир имтигьнариз гьязур хьувализ тувунза.
Мектебдиъ 10-пи класс ккудубкIбан кьяляхъ, вари имтигьнариз гьязур хьуз вахт гьубкIруганси, гъубшу йисан хьадну ЕГЭ-йихьна гьязур хьуз хъюгъюнза. Узу 3 имтигьян тувунза, гьарсаб имтигьяндиъ ужубсиб натижа улупуз чалишмиш гъахьунза. Информатикайиан 100 балл, урус чIалнаан — 95 балл, математикайиан — 88 балл гъадагъунза. Гьаддихъди сабси, мектеб ужудар кьиматариинди ккудубкIбаз лигну, узуз гъизилин медаль ва ГТО-йин гъизилин лишан тувну.
ЕГЭ-йиан 100 балл гъадабгъували узу имтигьяндин вари суалариз дюзди жаваб тувувал, дарс кIан’ан-кIулиз аьгъю гъапIувал субут апIура, думу гьиссну инсандин кIвак паплар кивру. Гьаму хъуркьували узу имтигьяндихьна гьязур хьуз харж гъапIу вахт ва зегьмет зяяди гъюдудубчIвувал тасдикь апIура.
Уьлкейин гьарсаб региондиъ, гьарсаб шагьриъ, ЕГЭ-йиан 100 балл ва гъизилин медалар гъадагъдар тебрик апIури, жюрбежюр серенжемар кIули гъушну. Ич шагьриъра медалар гъадагъдариз ва 100 баллин сагьибариз шадлугънан мярака тешкил гъапIну. Думу мяракайиъ шагьрин округдин кIулиъ айи Владимир Волковди, образованиейин министерствойин вакилари учуз, мялимариз, абйир-бабариз ич хъуркьувал тебрик гъапIну, пешкешар тувну.
Гьамус йиз улихь жара, хъана важиблу месэла дийибгъна: узу Баумандин ччвурнахъ хъайи МГТУ-йиъ «программайин инженерия» цирклиан аьгъювалар тувру факультетдик урхуз кучIвбанди вуза. Думу факультетдиъ урхбан кьяляхъ, «Инженер-конструктор ПО», «WEB-программист», «Программайин инженер» ва гьацдар жара пишйир гъадагъуз шулу.
Мектеб ккудубкIбан классдиъ урхурайидариз пуз ккундузузки, имтигьнариз гьязур шули, ичв вахт планламиш апIинай. Вари имтигьнариз гьязур хьуз вахт гъибтай.
Имтигьяндиз гьязур шлуган, гьарсаб дарснакан гьуркIу аьгъювалар тувру урхбан материалар, мялуматарин жюрбежюр дакьатар ишлетмиш апIинай.
Учвуз айи аьгъювалар мюгькам апIбан бадали, мектебдиъ ккудушу дарсар текрар, практикайин месэлйир гьял апIинай.
Имтигьнариз гьязур шлуган, рягьятвал гъадабгъуваликанра кIваълан магьарханай, сагъу уьмур хъапIбан рякъ бисай.
Йиз адаш Нажмудин Мазанов ГъуштIил гъулан вакил ву. Думу, МГУПП-диъ дурхну, инженер-механикдин кеспнан эйси гъахьну. Дада Минара Мазановара Гъвандикк гъулаъ бабкан гъахьир ву, дугъу Герцендин ччвурнахъ хъайи РГПУ-йиъ мектебдин ккергъбан классариъ дарсар кивру мялимдин пише гъадабгъну. Узу мектебдиъ гъадагъу хъуркьуваларик йиз абйир-бабарин лайикьлу пай ка. Дурар йиз сарпи мялимар ва тербиячйир ву. Ич хизанра ужуб, албагу ва аьхю хизан вуйич. Адашдина дадайи 4 велед тербияламиш апIура. Варидари мектебдиъ ужудар хъуркьувалар улупура.
Йиз адашна дада бабкан гъахьи бицIи юрд гизаф ккундучуз. Гьар йисан багъри ГъуштIил гъулаз гъюри шулча», — гъапнийи Марат Мазановди ич сюгьбатнаъ.
Маратдиз, чан кIваъ айи мурад-метлебарихъ хъуркьувал ккун апIури, пуз ккундузузки, ув’ин али сабпи буржи – мектеб хъуркьувалиинди ккудубкIувал, тамам гъапIунва. Гьамус яв метлеб – уьлкейин ужубсиб вузарикан сабдиъ дурхну, бахтлу уьмрин рякъюъди гъягъюри, Ватандиз хайир хувал, уву тербияламиш гъапIу абйир-бабар, аьгъювалар туву мялимар рази апIувал ву. Гъит яв уьмрин рякъ гьаммишан 100 балл гъадагъруганси дюзелмиш ибшри!.
