14-пи июль ихь уьлкейин агьалйирин яшайишдин цирклиз мяналу йигъ ву. 1956-пи йисан думу йигъан агьалйириз гьюкуматдин пенсйир тяйин апIбан гьякьнаан сабпи къанун адабгъну. Хъа сад йис улихьна, 14-пи июлиъ Пенсияйинна Социальный страхованиейин фондар сатIи апIбан гьякьнаан къанундиин къул гъизигнийи. 2023-пи йисан 1-пи январилан хъюгъну Урусатдин Социальный фондну чан ляхин ккебгъну.

 

 

Гьюкуматдин агьалйирин яша-йишдин политика уьмриз кечирмиш апIури, фонднан гьарсар гъуллугъчийи агьалйириз яшайишдин гъулайвалар тямин апIбиин зегьмет зигура. Ватандашари фонднахъди рягьятди аьлакьйир уьрхбан бадали, вари игьтияжар гьуркIувал – пенсйир, пособйир, жара пулар тувувал – электрондин форматдиз адагъна. Социальный фондну ватандашарин уьмур хъана рягьят апIбиин ляхин гъабхура.

Гьаму йисан январин вазлилан башламиш дапIну, Урусатдин Социальный фондну инвалид бицIидар хъайи абйир-бабариз дилиху йигъарихъанди 3,5 миллиард манатдин кьадарнаъди пул тувну.
Мялум вуйиси, инвалид бицIидариз артухъси хъайивал апIуз мумкинвал абгбан бадали, дицдар бицIидар хъайи абйир-бабариз вазлин арайиъ аьлава вуди дилихру 4 йигъ тувру. Уьмуми гьисабариинди, дицисдар абйир-бабариз 1,5 миллион дилихру йигъар тувна, гьадрарикан 4668 йигъ Дагъустандин вакилариз алахьура.
Сагъламвалик нукьсанвал кайи веледдин адашди ясана дадайи, аьлава вуди дилихру йигъ ккун апIури, учв лихурайи йишваз аьрза дибикIну ккунду. Гьадму йигъар, лазим вуш саб вазлин арайиъ сатIиди, дарш гьяфтайиъ саб ражари ишлетмиш дапIну ккунду.

Гьаму йисан сентябрин вазлилан башламиш дапIну, инвалид бицIидариз хъайивал апIбан цIийи шартIар ачмиш апIиди. Абйир-бабари ишлетмиш дарапIу йигъар сатIи дапIну, бицIириз хъайивал апIбан бадали, 24 йигъандин отпуск гъадабгъуз хьибди. Лихурайи адашди ясана дадайи, чпи лихурайи йишваъ отпуск гъадабгъру вахтнан гьякьнаан тешкилатдин кIулиъ айирихъди йикьрар дапIну, кадрйирин отделиз аьрза дибикIну ккунду.

Гьамусяаьт ишлетмиш дапIну адру йигъар сатIи апIуз ясана гъюру вазлиз гъахуз ихтияр адар.