15-пи июлиъ Каспийск шагьриъ айи «Анжи Арена» стадиондиин «Умра Хадж» проектдин тешкиллувалиинди, «Ватан» радиостанцияйин 16 йис хьпаз бахш дапIну, яркьу серенжем кIули гъубшну.

 

 

Думу серенжемдиз Дагъустан Республикайианси, Кафари Кавказдин вари регионариан 15 агъзуртIан артухъ касар уч гъахьнийи.

Серенжем асас вуди нашидар урхбахъди аьлакбалуб вуйи. Завариан сел убгъурашра, сарра хулаз дурушди, кьюб саятна гьацIан арайиъ уч духьнайи инсанар мархьликкди нашидар урхрударин серенжемдиз лигури ими.

«Ватан» радиостанция йибилейихъди тебрик апIури, нашидар урхбаан вари Урусатдиз машгьур вуйи Дагъустандин «Нашидуль ислам» дестейи, Мюгьяммед-Шафи Аьшуровди, Султан Трамовди, Рамазан Межидовди, Гьяадис Сабиевди, Юсуф Асхабялиевди, Гьямзалав Гьямзаловди, Заур Салигьовди ва лайикьлу нашидар урхбаан Чечен Республикайин артист Иса Эсамбаевди 2-3 нашидар гъурхну. Хъа серенжемдин варитIан гьюрматлу хялижв, вари дюн’яйиз машгьур вуйи нашидарин устад Магьер Зейнди чан варитIан адлу нашидар, серенжемдиъ иштирак шулайи вари 15 агъзур касди дугъахъди сабси хъипри, гъурхну.

Мидланра гъайри, уч духьнайидари вариди сатIиди, убгъурайи мархьликкди дийигъну, мушваъ зикирра ва салаватра гъурхну.
«Ватан» радиостанцияйин 16 йис къайд апIбан гьаму яркьу серенжемдиъ, «Умра Гьяж» проектдина ва серенжемдин кюмекчйири, Умрайиз вуйи 5 путевкйирра тпут ипбан жюрейиинди уйнамиш дапIну, 5 касдиз тувну.