«ВаритIан ужуб гьяят» Урусатдин конкурс уьмриз кечирмиш апIура-йиваликан улихьна йигъари «Дагъустан» РИА-йин конференцйир гъахру залиъ республикайин Госжилинспекцияйин кIулиъ айи Сергей Косьяновди ва республикайин «Гизаф мертебйирин хуларин агьалйир» проектдин кIулиъ айи Хиби Аьлиевди ктибтну.

 

 

Дурарин гафариинди, «Саб вуйи Урусат» партияйи тешкил дапIнайи му конкурс Урусатдиъ кIули гъябгъюри кьюбпи йис ву, ва цци, сачси дарди, конкурсдиъ иштирак хьуз кьабул апIурайи аьрзайиъ цIибди дигиш’валар тIаъна. Яна цци номинацйирра артухъ духьна ва конкурсра жара жюрейиинди кIули гъабхура. Цци улупнайи номинацйир гьамцдар ву: «Ужуб гьяят», «ВаритIан албагу хал», «Ужуб подъезд» ва «Энергетикайихъди варитIан файдалу хал».

Гизаф мертебйирин хулариъ яшамиш шулайи касариз, гьадму гьисабнаан гьятта квартира арендайиз гъадабгъну яшамиш шулайидаризра, госжилинспекцияйин сайтдиъ учIвну, аьрза тувбиинди конкурсдиъ иштирак хьуз мумкинвал а. Конкурс гъабхбан асас метлеб — гизаф мертебйирин хулариъ яшамиш шулайи гьарсар агьали душваъ апIру дигиш’валариъ иштирак хьуз гъитувал ву.
Конференцияйин иштиракчи Хиби Аьлиевди мялум гъапIганси, 10-пи июлихъан 10-пи октябризкьан давам шулайи конкурсдиъ дагъустанлу-йирихьан гъийин йигъаз саки 30-рихьна аьрзйир дуфна. Гьаддиинди инсанарин му конкурсдин хъугъ’вал аливаликан пуз шулу. Гьацира, дугъу къайд гъапIганси, гъубшу йисанра конкурсдиъ иштирак хьуз аьрзйир тувдарикан Дагъустан кIакIначи регион вуйи.