Эгер учвуз гьаму йигъари, гъул’ан зенгер апIури, рягьятвал гъадабгъуз гъачай, кIураш, мухъугъанай. Гьамусяаьт гъулариъ мал-къарайиз укIар-кIажар уч апIру вахт улубкьна. Учвуз дина кюмекназ гъач кIурайиб ву. (Зарафат).

 

 

Июнь вазлин эвелариан июлин аьхираризкьан Хив райондин терефнан гъулариъ, кьюрдуз мал-къарайиз фургьанди гьубкIну алаф уч апIури, вари агьалйир хярар уршвбиин машгъул духьнайи вахт ву. Гьелбетда, му вахтна гьарсар касдин кIваан, завлан тIибхурайи жакьвликанра кюмек хьуз ккунийкIана кIури, хиял гъябгъюру. Гьаци гъуларин саб бязи агьалйирихьна, му вахтнан гъагъи зегьметнахьан гучI дарди, шагьрариан тятIилариз деетнайи баяр-шубар ва отпускариъ айи дурарин абйир-бабар кюмекназ гъюри шулу.

Агъсакъларин гафариинди ва фикрариинди, кьюрдуз саб мализ ясана шубуб чарвайиз булди гьубкIну ккабхьру алафдин кьадар саб машиндиъ айи укI вая хьуцIур кип шула. Гьадму гьисабназ гъадабгъну, жвуван маларин, чарвйирин кьадарра фукьан вуш лигну, гьадмукьан зегьметра дизигну ккунду. Дарш кьюрдну, алаф абгури, гъюлягъ гъяхъди.

Гьавйири манигъ’вал апIурашра, мархьликкди убшвури, ригъдиккди ккадабгъури, гужназ тадабгъурайиганси, халкьди алаф уч апIуз гъизгъинди чарйир агура. Вахтниинди мархьар дархьбаз лигну, цци укIар-кажар кьитди ву. Вушра фукIа дар, айибдик сар Аллагьди берекет кивур.

Гъит ихь гъуларин агьалйири алафдихъ зигурайи жафа кьюрдну юкIв шадди, жан сагъди мал-къарайиз ккабхьруб ва ишлетмиш апIруб ибшри!