19-пи июлиъ Дагъустандин Глава Сергей Меликовди республикайиъ 2025-пи йисаз ва пландин 2030-пи йисариз агьалйирин сагъламвал уьбхбан циркил артмиш апIбан месэлйириз бахш дапIнайи совещание кIули гъубхну.
Совещаниейин иштиракчйири циркил артмиш, дидин материалинна техникайин бина мюгькам, медицинайин идарйириъ лихурайидарин кьадар артухъ апIбан, республикайин сагъламвал уьбхбан цирклиъ цифровизация гъабхбан ляхин гьяракатнаъ ипбан месэлйир гьял гъапIнийи.
Асас доклад хьади серенжемдиъ удучIвну гъулху республикайин сагъламвал уьбхбан министр Татьяна Беляевайин гафариинди, республикайин больницйириъ йишвнура, йигънура 18 агъзур аьзарлу дахъру ва йигъандин 3 агъзур аьзарлу дахъру йишвар гьатIарццна.
Дагъустан бабкан гизаф бицIидар шлу, инсандин уьмур ярхиб, хъа кечмиш шулайи касарин кьадар цIиб вуйи регионарикан саб ву. 2023-пи йисан сабпи кварталиъ инсанарин уьмрин ярхишнаан, Москвайин областдихъди сабси, Дагъустан сабпи йишваз удубчIвну. Республикайиъ думу улупуб 79,2 йис ву. Региондиъ бабкан гъахьи бицIидар йихувалин кьадарра цIиб шула.
«Аьхиримжи 2 йисандин арайиъ модернизацияйин программайин дахилнаъди сагъламвал уьбхбан цирклин 61 объект бинайиан рас дапIна. 5 объект цIийи алаъну, ухди уч апIру сагъламвал уьбхбан модулин 60 идара дивну, гьадму гьисабнаан 55 ФАП, духтирвалин 2 амбулатория ва 3 поликлиника. Мидланра савайи, 268 машин ва медицинайин лазим вуйи 806 авадлугъар, алатар ишлетмиш’вализ тувну», – гъапнийи Татьяна Беляевайи.
Медицинайи кадрйир гьязур апIбакан улхури, РД-йин Правительствойин председателин заместитель Аьбдурягьман Мягьмудовди гьаму йисан республикайиъ абитуриентар гъядягъбан комиссияйи ляхин апIурайиваликан гъапнийи. Комиссияйин метлеб – медицинайин вуздик урхуз кучIвру выпускникарикан ужударсдар гъядягъювал ву.
Улихьнара Сергей Меликовди къайд гъапIганси, республикайин образованиейин гъурулушдиъ арайиз дуфнайи аьгьвалатну абитуриентар жара шагьрариз урхуз гъягъюз мажбур апIура. Гьаддиз, абитуриентар вузариз кьабул апIруган, коррупцияйин гьяракатар терг дапIну ккунду.
Совещаниейиъ хъпехъу докладариз кьимат туври, Сергей Меликовди гьял дапIну адру месэлйир гъитIирккувал ккун гъапIнийи. «Гьар ражари хъуркьуваларикан ебхьуразуз. Хъуркьувалар – му ужуб ляхин ву, хъа гьял апIуз удукьну адру месэлйириканра аьгъяди ккунду. ГъалатIариин ляхин апIури, ужудар натижйирихъна гъюз шулу»,–гъапнийи дугъу.
Республикайин кIулиъ айири гьаму йисан сентябрин ваз улубкьайиз республикайин сагъламвал уьбхбан циркил артмиш апIбан региондин программа тартиб апIуз табшуругъ тувнийи.
