Дагъустан Республикайин Конституцияйин йигъ къайд апIбахъди аьлакьалу вуди, «Дагестанская правда» газатдин редакцияйиъ РД-йин юстицияйин министрин заместитель Сергей Караченцев республикайин СМИ-йин вакиларихъди гюрюшмиш гъахьну. Дугъу, журналистарин суалариз жавабар туври, Дагъустандиз хусуси конституция гьаз вуш, дидиъ дигиш’валар тIаувал лазим вуш-дарш, РФ-дин бицIи субъектар сатIи апIбан месэла гьаз яваш гъапIнуш ва гьацдар жара суалариз жавабар тувнийи.
Сергей Караченцевдин фикриинди, гъи айибсиб Конституция Дагъустан Республикайиз лазимра ву, важиблура ву: «Дагъустан Республика РФ-дин гьюкуматдин лишнар кайи, кIул’индии вуйи субъект ву. Хъа ухьуз мялум вуйиганси, гьарсаб гьюкуматдиз чан биналу къанун ади ккунду. Думу къанун Конституция ву».
Министрин заместителин гафариинди, субъектдихьан «уьлкейин гьюкмин вари ихтиярар кIл’ина гъадагъуз шулдар», фицики республикайиз бегьемди экономикайин мумкинвалар адар.
«Гьамусяаьт республикайин экономикайин аьгьвалат дигиш дубхьна: экономикайиз жара апIурайи дакьатарин кьадар артухъ шула, рякъяр тикмиш апIбан цирклиъ ужудар дигиш’валар рякъюра, яшамиш шлу хулар тикмиш апIувал гьяракатнаъ а, гъулан мяишатдин цIийи карханйир арайиз хура. Вари гьаму ляхнар федеральный бюджетдин гьисабнаан ясана жара регионариан гъюрайи инвесторарин пулихъ апIурайидар ву», – гъапнийи Сергей Караченцевди.
Пресс-конференцияйиъ РД-йин юстицияйин министри РФ-диъ бицIи субъектар сатIи апIуз экономикайин мумкинвалар адруваликанра къайд гъапIнийи. Дугъан фикриинди, гьюкмин кIулиъ айидар багарихьди думу ляхин тамам апIбанди дар. Себебар – миллетарин арайиъ наразивалар хьпан, экономикайин интеграцияйин месэлйир арайиз гъюбан мумкинвал а.
Урусатдиъ субъектар ктикьуб саб Красноярский крайтIан дар, думура, регионарин экономика сатIиб вуйивализ лигну, чIатху гъапIуб вуйи.
«Урусатдин Федерацияйин дахилнаъ республикйир гьаз гъузну? Аьдати вуйиси, республика – саб миллетдин вакилар яшамиш шулайи аьтраф ву. Вари республикйириъ милли лишнар а. Эгер жюрбежюр миллетар айи республикйир ктикьиш, сатIи гъапIиш, миллетарин арайиъ наразивалар арайиз гъюб мумкин ву. Мидланра савайи, субъектар чIатху апIбан бадали, сабпи нубатнаъди экономикайин рякъяр къайдайиз духну ккунду», – гъапну Сергей Караченцевди.
Гьацира, дугъан гафариинди, субъектар сатIи апIували ухди-кьанди бицIи миллетар дургувалихъна хибди: «Аьхиримжи 100 йисандин арайиъ дюн’яйиъ варжтIан артухъ халкьар гъудургну. Хъа Урусатди бицIи халкьар уьрхюз ва артмиш хьуз мумкинвал тувра».
Гюрюшдин аьхириъ Сергей Кара-ченцевди Дагъустан Республикайин Конституцияйиз цIийи дигиш’валар лазим даруваликанра гъапнийи. «Гъубшу йисан Конституцияйиъ гизаф дигиш’валар тIаънийи. Думу дигиш’валар Дагъустан Республикайин государствойин гьюкмин гъурулуш тешкил апIбаз бахш дапIнайи. Эгер аьхиримжи кьюд йисан гьял апIурайи, ерли самоуправлениейин гьякьнаан вуйи федеральный къанундиъ дигиш’валар тIаиш, ихь Конституцияйиъра ди-гиш’валар тIаъди. Думу къанундин проектди ерли самоуправлениейин гъуларин ва шагьрарин дережа хъябкьюб тIалаб апIура. Думуган муниципальный вари гьюкум муниципальный районарин ва шагьрарин округарин дережайиъ дийибгъиди», – къайд гъапIнийи министрин заместители.
