Дагъустан Республикайин Глава Сергей Меликовди «Хабрар» РИА-йин журналистдихъди вуйи сюгьбатнаъ, СВО-йиз рягьимлувалин аьхю кьадар кюмек туву регионарин арайиъ Дагъустан гьаз аш, чан фикрар ачухъ гъапIну.

 

«Рягьимлувалин кюмек апIруган, республикайин агьалйир, гьадму ужувлан ва манишнан пай ихь эскрарихьна хъубкьрувалин гъавриъ а. Хъа дурарин метлеб рягьимлувалин кюмек респуб-ликайин вакиларихьна хъубкьувал дар: рягьимлувалин кюмек татар, урус, башкир, жугьуд миллетдин эскрарихьна, Забайкальейин ясана Уралин вакиларихьна гъурубкьишра, дурариз тафавутлувал адар. Думу хьайин мурслин атIнар ургъру яшлу инсанарин уж’вал, фронтдиз кагъзар дикIру ва кагъзихъди чаз багьа вуйи мутму хътапIру ихь бицIидарин, хъа думу мутму гьякалси уьбхру ихь эскрарин кIван гьяракат ву, . Ухьу гьацдар инсанар вухьа, ихь Ватан гьациб ву: бицIибра, аьхюбра», – гъапну Сергей Меликовди.

Дугъриданра, ихь дагъустанлуйир гизафси гьациб ужуб юкIв айидар ву. Учу газатдин улихьдин нумрйирикан сабдиъ, СВО-йиъ айи урус бализ чан уьлчмейин ликариин алахьрудар адарди, гъячIяргъю кроссовкйириккди лицури гъахьиваликан гъибикIнийча. Хъа дугъахъди дявдин гъуллугънаъ айи табасаран бай Гьясрат Мягьямедовдиз урус эскрин язухъ дубхьну, Каспийскдиъ яшамиш шулайи чан чуччуз урус бализ 52-пи уьлчмейин берцйир агувал табшурмиш гъапIнийи. Чуччу Дагъустандиъ берцйир агури, саб ваз гъабхьнийи. Гъидихънийи ва СВО-йиз гъягъюрайидарихьди хътаънийи. Думу берцйир урус бализ туву табасаран бай СВО-йиъ аварияйикк ккахъну гъакIнийи. Аллагьди дугъан гунгьарин аьфу апIри, чан рягьимлувалин кIваз дилигну, дугъан улихь Женнетдин раккнар ачмиш ишри.