Дагъустандин Конституцияйин йигъ къайд апIбан шадлугънан серенжемарин дахилнаъди РД-йин премьер-министр Аьбдулмуслим Аьбдулмуслимовди Урусатдин Федерацияйин цIийи аьтрафариин (Запорожьейин областдиъ, Мелитополиъ ва гьацдар жара йишвариъ) лихури гъахьи ихь республикайин 9 мялимдиз «Дагъустан Республикайин лайикьлу мялим» кIуру ччвур ва гьадму ччвурнахъди мухрик кибтIру лишан тувну.
«Гьякьлу ватанперверар вуйивализ лигну, дурари чпин пишекарвалин буржи тамам гъапIну, чпин аьгъювалар ва тажруба ихь ватандин жигьил наслариз тувну. Ичв зегьметназ чухсагъул», – гъапну шадлугънан серенжемдиъ Аьбдулмуслим Аьбдулмуслимовди.
Гьюрматнан ччвурар тувдарин арайиъ ихь ватанагьли, Табасаран райондин ТIюрягъ гъул’ан вуйи мялим Загьирбег Селимовра а. Загьирбег Незюрович чаз туву лайикьлу ччвурнахъди тебрик апIури, дугъаз жандин мюгькам сагъ’вал, хъана заан хъуркьувалар, чав ляхин гъапIу ругариина ислягьвал дуфну, вари баяр-шубарин ва дурарин абйир-бабарин юкIвар шад хьувал ккун апIурача.
