Саки гьар гьяфтайиъ «Табасарандин нурар» газатдин машариъ Украинайин аьтрафариин кIули гъабхурайи хусуси метлеб айи дявдин операцияйиъ иштирак шулайи ва чпин жанар фида гъапIу жюрэтлу дагълу баярикан макьалйир чап апIури шулуча. Жюрэтлу баярикан бикIру вахтна ич хилиъ айи кьаламра гьяракатнаъ абхъру, хъа чпин жанар фида гъапIу баярикан бикIруган, кьалминра думукьан кефи шулдар. Дугъриданра, зарафат дар, Ватандин Аьхю дявдиъси, гъира хайлин ихь жигьилар йихура. Анжагъ саб Табасаран райондиъ хьуцIуртIан артухъ жигьилар гъийихну ва му аьгьвалат ужуб терефназ дигиш шуладар кIури, хабрар а. Ва дурариканра дибрикIди гъузуз шулдар. Табасаран райондиан Бургьанкент гъулан мектебдин выпускникар вуйи Артур Аьгьмедовди ва Шарафудин Истархановди, ДНР ва ЛНР халкьдин республикйир Киевдин мянасуз политикайин зулмиккан азад апIбан бадали, чпин жанар фида гъапIну. Дурар гъубшу 2022-пи йисан гъийхну кIури, хабар гъафну, амма дурарикан вуйи мялуматар узухьна гьамус хътаъну. Мялуматар фила хътаишра, дицисдар баярикан бикIувал ихь буржи ву. Дурарин ччвурар гьаммишандиз Урусатдин тарихнаъ гъузди.
Истарханов Шарафутдин Рамановичди 2022-пи йисан 1-пи апрелиъ Донецкдин Халкьдин Республикйин Великоновоселковский райондин Золотая Нива кIуру гъулан гъирагъдихъ гъизгъин женгариъ чан жан фида гъапIну. Контракт йибтIну думу гъуллугънаъ лихури, дугъан сад йистIан дайи. 2021-пи йисан дугъу Ингушетия Республикайин Сунженский райондиъ ерлешмиш дубхьнайи 75394 танкарин полкнаъ гъуллугъ апIури гъахьну. Дяви ккебгъу сабпи йигъланмина думу гъагъи женгариъ иштирак шулайир вуйи.
Шарафудин 1994-пи йисан Табасаран райондин Хюряхъ гъулаъ бабкан гъахьну. УрчIвубпи класс дугъу Хюряхъ гъулан бегьем дару мектебдиъ ккудубкIну, хъа имбу 10-11-пи классар Бургьанкентдин мектебдиъ давам гъапIну. Бургьанкентдинна Хюряхъ гъулан совет саб ву, гьаци вуйиган учуз думу гъулан инсанар лап багахь вучуз. Шарафудинди кьюбби мектебариъра ужуди гъурхну, думу гизаф саламат, дирбаш бай вуйи. Думу дадайиз айи сар жили велед, чан саб яш гъабхьи вахтна умуд кайир вуйи. Гъи магьа дугъан хулаъ дугъаз ккилигурай чан уьмрин юлдаш, жигьил хпир Фатима ва адашдихъ мягьрум гъахьи кьюр уччвудар бицIи баяр Мирказ ва Уьмар ими.
Аьгьмедов Артур Камилпашаевич 1986-пи йисан 14-пи сентябриъ Табасаран райондин Бургьанкент гъулаъ бабкан гъахьну. Дупну ккундуки, Артур Украинайиъ кIули гъабхурайи хусуси метлеб айи дявдин операцияйин женгариъ сабпи йигъланмина иштирак шулайи. Женгариъ дирбашди иштирак шулайивализ лигну, думу Жуковдин ордендииндира пешкешлу гъапIнийи. Хъа гъубшу 2022-пи йисан 9-пи сентябриъ дурарин эскрарин десте Днепр нирин гъирагъдихъ душмнарин яракьдиан йивбарик ккабхъуру. Дугъан майит чав бабкан гъахьи 14-пи йигъаз гъулаз хъубкьуру, ва гъулан жямяаьт, варис-мирас уч духьну, думу фаракьат апIуру. Артурин яш анжагъ 36 йистIан дубхьнадайи. Дугъу 2014-пи йисхъан мина Крымдин Перевальное гъулан гъирагъ уьбхюрайи яракьлу кьувватариъ гъуллугъ апIури гъахьну. Артур гизаф фикир хъайи, дирбаш бай вуйи. Гъи дугъан шубур йитим гъахьи шубар ими. Аьгьмедоварин хизан Бургьанкент гъулаъ гизаф гьюрмат айи, саламат хизан ву.
Му уьмриъ ухьуз вари рябкъюру — ужубра, харжибра. Амма уьмриъ фу гъабхьишра, фицдар гьядисйир улуркьишра, инсанди варибдиз сабур дапIну ккунду.
Украинайиъ кIули гъягъюрайи гъагъи женгариъ чпин жанар фида гъапIу баярин абйир-бабариз пуз гафарра дихъурдар, жвувазра гужалди тясир апIуру. Думу бабарин ишларикан гъи хажалатнан шиърар ва пашманвалин мяълийир духьна. Саспи бабарихъди сюгьбат гъабхру вахтна, дурари кIурайи «завуз тIирхидийза, ягъалди ву, жилиъ учIврийза, ижмиди ву» ва гьацдар жара дерднан гафари кIваз иццру апIру. Игит баяр аьхю ва тербияламиш гъапIу гирами, гьюрматлу бабар, варидариз учвуз аферин, Аллагьди сабур тувричвуз. Учвухъди сабси думу дерд учузра вучуз. Гюльбагьар ва Света, му аьхю дерд аьх апIуз учвуз аллагьди сабур тувричвуз.
