Дагъустандиъ 26-пи июль РД-йин Конституцияйин йигъси тасдикь дапIна. Му йигъан кIулди вари республикайиъ шадлугънан серенжемар гъахури, сар-сариз машквар мубарак апIури, ляхниъ тафавутлу гъахьидариз пешкешар туври шулу. Гьацдар серенжемар Табасаран ва Хив районариъра гъухну.
Республикайин важиблу машквар
Мегьти Аьдилов
25-пи июлиъ Табасаран райондиъ, республикайин асас машквриз тялукь вуди, шадлугънан митинг ва жара серенжемар кIули гъушну.
Дурариъ райондин глава Мягьямед Къурбановра иштирак гъахьну. Митинг Хючна гъулаъ Культурайин хулан улихь кIули гъубшну. Дидин сяргьятариъди райондин депутатарин Собраниейин председатель Иса Исаевди му мшквар арайзи гъюбан тарихнакан, чпиъ гизаф миллетар яшамиш шулайи юрднан хусусивал, жарадариз ухшар дарувал ва республикайин халкьдин аьдатар атIагнайи Дагъустандин асас къанунарикан ва гьюкуматдин лишнарикан ктибтну. Мидкан учуз муниципалитетдин пресс-гъуллугънаан хабар тувну.
Хъасин, му машкврихъди аьлакьалу вуди, Ургур чвуччвунна сар чу-ччун гъалайиин «Учу дагъустанлуйир, Урустадин агьалйир вуча» кIуру флешмоб кIули гъубхну. Дидиъ муниципалитетдин жигьилари иштирак’вал гъапIну. Райондин кьялан библиотекайиъ «Дагъустан: накь, гъи ва закур» кIуру шикларин выставка ва «Дагъустан – йиз Ватан» темайиан гергми стол кIули гъушну. Мидин кьяляхъ Дагъустандикан ва Табасарандикан ватанпервервалин мяълийир апIури, халкьдин мукьмар йивури сягьнйир улупури, машкврин концерт гъабхьну. Му серенжемариъ райондин администрацияйин, идарйирин ва тешкилатарин гъуллугъчйири иштирак’вал гъапIнийи.
Хъа Табасаран райондин глава Мягьямед Къурбановди райондин агьалйир му машкврихъди тебрик апIбаъ гьамци дупна: «Табасаран райондин гьюрматлу агьалйир! Аьзиз дустар! Учву гьюкуматдин машкврихъди – Дагъустан Республикайин Конституцияйин йигъхъди тебрик апIураза!
Конституция – Урустадин Феде-рацияйин сяргьятариъди ихь паччагьлугъвалин дибар тяйин, ватандашарин ихтиярарин ва азадваларин заминвал тямин гъапIу важиблу документ ву. Асас къанун кьабул апIували гизаф миллетар айи ихь республикайиъ ислягьвал ва дурумлувал уьрхюз, тарихнаанмина арайиз гъафи сабвал мюгькам апIуз мумкинвал тувну.
Гьар йигъандин яратмиш апIбан зегьметниинди ухьу ихь милли хазна уьбхбан ва артухъ апIбан месэлйир гьял апIбак, республикайин экономика, социальный ва культурайин цирклар артмиш апIбак, ватандаш жямяаьтлугъ мюгькам апIбак жвуван пай киврахьа.
Ихь вазифа – Конституцияйиъ айи вари миллетарин кьиматлувалар кIваина хуб ва уьрхюб, дурариз асас вуди, дурумлу, къанунди агъавал апIурайи республика тикмиш апIуб ву.
Вари гъурулушарин мянфяаьтлу ляхни, ватанагьлийирин зегьметну ва сатIивали инсанарин хушбахт яшайиш тяйин, ислягьвал ва дурумлувал мюгькам апIбан месэлйир хъуркьувалиинди гьял апIуз мумкинвал тувди.
Варидариз ислягьвал ва хушбахтвал, Дагъустан Республика бадали зегьмет зигбаъ хъуркьувалар ккун апIураза».
Шадвалин серенжемарин йигъ
Мейлан Нежефов
Республикайин вари шагьрар ва районариъси, Хив райондиъра му йигъаз тялукь вуйи саб жерге серенжемар кIули гъушну.
Гьаци «Къанун ихь уьмриъ» кIуру акцияйин шилнаъди библиотекйириъ, бицIидарин багъариъ ва мектебариъ урхурайдарин арайиъ шиклар зигбаан, цалин газатар гьязур апIбаан, шиърар урхбаан, шахматариан, футболиан жюрбежюр конкурсар ва талитар кIули гъухну. Волонтерари, чIаларин гъарзун чIулси, дуствалин гъала вуйи Дагъустандикан мялуматар кайи буклетар тувбан акцияра тешкил гъапIнийи.
Мидланра савайи, 25-пи июлиъ райондин РКДЦ-йиъ му йигъаз бахш дапIнайи концертдин программара кIули гъубшнийи. Концертдиъ улупнайи вари конкурсарин ва талитарин натижйир йивури, дурарин гъалибчйир ва гьацира ужудар хъуркьувалариинди мектеб ккудубкIу выпускникар, чпин тIалабар намуслувалиинди тамам апIурайи волонтерар, мялимар, духтрар ва пишекарвалин жара цирклариъ баркаллуди лихурайи гъуллугъчйир пешкешар ва чухсагъул мялум апIбан кагъзар тувбиинди лишанлу гъапIнийи. Гьаму йигъан яшар бегьем гъахьи живанариз паспортарра тувнийи.
Культурайин цирклин гъуллугъчйирира Р. Гьямзатовди шиърар табасаран, авар ва урус чIалариинди урхури, мяълийир апIури ва театрин сягьнйирин кьатIар улупури, серенжемдиина мешреб гъабхнийи.
СумчIуртIан артухъ ерли миллетар, арайиъ сабвал, дуствал ва мясляаьт уьрхюри, швнуб-саб аьсриъ яшамиш шулайи ихь республикайикан кидибтну, гьациб баркаллувалин гвачIин-хябяхъ ади Хив райондиъра кьюб миллетди уьл ипIури магьа, район арайиз дуфну, ккудушу 88 йисандин арайиъ гъирагъдизди саб сес-дих адарди яшамиш шулайиваликан дупну, ва гележегдиъра райондин администрацияйин асас метлеб – миллетарин арайиъ айи манишнан ялав кам хьуз гъидритувал вуйиб къайд дапIну, Хив райондин глава Ярмет Ярметов, РД-йин Конституцияйин йигъ тебрик апIури, райондин агьалйирихьна илтIикIнийи.
«Гьюрматлу ярар-дустар! Къа-нундин ирс – ихь уьмриъ абйирилантина гъубзнайи ва гъюзимбу касаризра гъубзру уьмарат ву. Гъи ихь баяри, заан дережайиинди дидин къайдйир тамам апIури, ватандаш’валин хатI улупури, Украинайин аьтрафариин жанар дивра. Кьувватлу Урусат гьаму дявдин майдандианра гъалибвалиинди удубчIврувалиин ухьу умудлу вухьа ва хъугърахьа. Ихь республикайин гьюкуматдин варитIан асас ва важиблу машквар учвуз марцци кIваан тебрик апIури, гьарсаб апIру хайирлу ляхин-карнаъ ужудар сяътар, хъуркьувалар, мюгькам сагъ’вал, хизандин арайиъ манишнан ялав ади хушбахтлу ва мублагъвалин уьмрин эйсир хьувал ккун апIураза. Гьарган ихь кIул’ин ислягьвалин укIу зав, вари халкьарин арайиъ мясляаьтнан ялав гъубзри!» – гъапну дугъу.
