Республикайин Конституцияйин йигъ Дагъустандин Правительствойин председатель Аьбдулмуслим Аьбдулмуслимовди гизаф бицIидар хъайи дада, Табасаран райондин Куркакк гъул’ан вуйи, Эспет Ханмягьямедовайиз Амет-Хан Султандин ччвурнахъ хъайи «Жигьилариз ватанпервервалин тербия тувбак пай кивбаз лигну» медаль тувну.

 

 

 

«Эспет Ханмягьямедовайи 12 велед тербияламиш гъапIну. Дугъан баяри ва худлари Урусатди кIули гъабхурайи хусуси метлеб айи дявдин операцияйиъ намуслувалиинди чпин эскервалин буржи тамам апIура. Дурар, чпин уьмур гьяйиф дарапIди, чвевалин халкьарин ихтиярар, азадвал уьрхбан женгнаъ а. Ихь уьлкейин азад артмиш’валин тереф дибисна. Аллагьди увуз сагъу ва ярхи уьмур тувривуз, яв баяр-шубарихъан юкIв гьарган саламатди ибшрияв, баяр ва худлар дявдин операцияйиан сагъ-саламатди кьяляхъ гъюрияв», – къайд гъапIну республикайин министрарин кабинетдин кIулиъ айи Аьбдулмуслим Аьбдулмуслимовди.

«Узуз аьхю хизан азуз, 12 велед бабкан гъахунза. Дадавалин зегьмет фициб вуш, варидариз мялум ву: даърахди гьау йишвар, хизандин мяишатдин ляхнар ва хъана жарадар. Учхьан удукьруси зегьмет дизигну, ужудар веледар арайиз адагъунча. Шадвалин йигъарра фукьан вушра улуркьну, пашман йигъарра гъахьну. Хъа гьамус веледар аьхю духьна. Дявдин гъуллугънаъ а. Баярра, худларра хусуси метлеб айи дявдин операцияйиъ иштирак шула. Сар худул душмандин гюллиан гъакIну. Гьамус августдин 5-диъ думу гъакIихъанмина сад йис тамам шула. Думу пашман дюшюшди вари шадвалин йигъар ктIуршвну.

Узуз медаль тувувализ лигну, уьлкейин, республикайин кIулиъ айидариз чухсагъул мялум апIуз ккундузуз», – гъапнйи чан терефнаан Эспет Ханмягьямедовайи.