30-пи июлиъ Каспийск шагьриъ Урусатдин дявдинна гьюлин флотдин йигъ яркьуди къайд гъапIнийи.

 

 

Машкврин йигъан дахилнаъди хусуси метлеб айи дявдин операцияйиъ тафавутлу гъахьи Каспийин флотилияйин гъуллугъчйириз флотилияйин кIулиъ айи контр-адмирал Александр Пешковди ва Дагъустан Республикайин Правительство-йин председатель Аьбдулмуслим Аьбдулмуслимовди гьюкуматдин ва дявдин наградйир тувнийи. Лишанлу гъапIдарин цIарнаъ ихь ватанагьлира – Хив райондин Чювекк гъулан агьали, гьюлин пияда кьушмарин гъуллугъчи, сержант Къайиб ТIагьировра айи. Дугъаз, СВО-йиъ дявдин месэлйир гьял апIбаъ улупу игитвализ ва кьягьялвализ, хъа гьацира жигьил наслиз ватанпервервалин тербия тувбак киву лайикьлу пайназ лигну, «Улупу кьягьялвализ лигну» медаль тувну.
Ич сюгьбатнаъ Къайиб ТIагьировди чан гъуллугънакан ва чав СВО-йиъ иштирак хьуваликан ктибтнийи.

Къайиб Аюбович ТIагьиров 1986-пи йисан 15-пи августдиъ Мягьячгъала шагьриъ бабкан гъахьну. Кьюбпи классдизкьан дугъу адашдин багъри гъулаъ – Хив райондин Чювккерин кьялан мектебдиъ, хъасин Мягьячгъала шагьрин 7-пи ва 22-пи нумрйирин лицеяриъ гъурхну. 2004-2010-пи йисари Мягьячгъала шагьриъ РФ-дин Минюстдин правовой академияйиъ заан юриствалин образование гъадабгъну. Миржид йисан думу, «Бакай» ООО тешкил дапIну, алвер апIбиин эллешмиш гъахьну.

2018-пи йисан Къайибди чан уьмрин рякъ кьатI’иди дигиш апIуру – думу, контракт йибтIну, дявдин гъуллугънаъ учIвру. Гьаддихъанмина гъи-йизкьан дугъу Каспийин флотилияйин 177-пи жаради вуйи гьюлин пияда кьушмарин полкнаъ гъуллугъ апIура.

Хусуси метлеб айи дявдин операцияйиъ Къайиб ТIагьиров сабпи йигъланмина иштирак гъахьну.

«24-пи февралиъ учу Украинайин сяргьятарилан улдучIвунча. Сабпи шагьур, Бердянск, саб пакьра дарапIди гъадабгънийча. Хъасин саб вазлин арайиъ ич полк, саб дугъужвувалра адарди, Запорожский областдин гъулар ва поселкйир хилиз гъадагъури, улихь гъябгъюри гъахьнийи. Дюзди дупну ккунду, ич полкнан эскрар СВО ккебгъайиз улихьна саки кьюд йисандин арайиъ полигондиин, дявдин аьгьвалатназ лап багахь вуйи шартIариъ гьязур апIури гъахьнийи», – ктибтнийи Къайиб ТIагьировди.

Чан сабпи дявдин наградайиз – Жуковдин медализ – Къайиб, женгнаъ зийнар духьнайи батареяйин командир аьжаликкан уьрхювализ лигну, лайикь гъахьну.
«2022-пи йисан 5-пи майиъ «БАРС-8» жаради вуйи минометдин батарея украинлу эскрари минйир ккивнайи хутIлизди адабхънийи. Думуган батареяйин командирин хилизра, лик-ризра гъагъи зийнар гъахьнийи, сар разведчикдикра минйирин тикйир куркIнийи. Дурарилан савайи, 30-сан эскрар думу хутIлиан хатIасуз терефназ адагъну ккундийи. Узу эвакуация апIру отделенийин командир вуйза, ва йиз хиликк ккайидарихъди БТР-иъди ихь эскрариз кюмекназ гъушнийза. Вари 30 кас ва зийнар духьнайидар, гьадму гьисабнаан лицуз шули имдру комбатра, носилкйириина гъадагъну, женгнан яцI’ан адагънийча.

Хъасин узуз зиян дубхьну, Москвайиъ Бурденкойин ччвурнахъ хъайи дявдин госпиталиъ дахънайиган, душваъ узу дявдин женгнаан адагъу офицер сабсан ражну алахънийзуз. Гьяйифки, духтрарихьан дугъан хил уьбхюз гъабхьундайи. Учв госпиталиан удучIвруган, командир узухьна палатайиз дуфну, учв аьжаликкан ккадагъбаз узу сабансан ражари чухсагъул гъапнийи», – ктибтнийи чаз госпиталиъ айи вахтна туву сабпи медалин тарихнакан Къайиб ТIагьировди.

Хъа 6-пи майиъ ихь эскрар Червонное поселокдиин алжагънийи. Танкариз аькси ракетйирин комплексдиан («Джавелин») йивну, ихь эскрар айи БТР-ик цIа кабхъган, Къайибдин экипаждиз дурар женгнаан адагъуз буйругъ тувнийи.

«БТР-иъ лишникк ккаъну гюллйир йивру эскер мар-цциди гъургнийи, имбудариз гъагъи зийнар духьнайи. Учу, чвурхури ва душмнариз яракьдиан йивури, цIа кабхънайи БТР-ихьна багахь шулайча. Сабпну ич терефназди тIибхурайи ракета гъябкънийзуз. Гъвалахъ йиз отделениейиан вуйи эскер, аьхюну матрос Килинж Гьяжиев дахънайи. Узу, дишлади дугъ’ина ккатIархьну, думу жвуван бедендикк ккаънийза ва гъутIубкIу ракетайин тикйирихьан гъюрхнийза. Чан нубатнаъ дугъу, зийнар духьнайи узуз медицинайин сабпи кюмек дапIну, ич взводин командирин заместителин ва имбу эскрарин кюмекниинди узу женгнаанра адагънийи. Узуз гъи туву награда гьадму йиз хиликк ккайи эскер уьрхювализ тувуб ву. Эгер узу думу йиз бедендихьди гъюрхюндайиш, учуз кьюридаризра зийнар шуйи ва натижайиъ кьюридра йихуйи. Медаль узуз саб нуфтдин арайиъ адабгъу дюз къарарназ тувуб ву», – ктибтнийи Къайибди кьюбпи медалин гьякьнаан.

Чювекк бай «Эскервалин дирбаш’вализ лигну» медалин сагьибра ву. Дугъан командирарин гафниинди, Къайиб ТIагьиров сабсан медалиинди лишанлу апIуз улупна. ЦIийи награда тувбан бадали, лазим вуйи документар оборонайин министерствойиз хъадаъна, амма саки йис гъубшнушра, гьеле саб хабар адар.

Къайиб ТIагьировдиз СВО-йин вахтна чаин улуркьу вари хатIалу гьядисйирикан ктибтуз ккун гъабхьундайи… Хъа офицер лап читин дюшюшариъ ахъуваликан дугъаз гъахьи гъагъи зийнари субут апIура – Къайиб ТIагьиров Бурденкойин ччвурнахъ хъайи дявдин госпиталиъ 8 вазлин арайиъ зийнар сагъ апIури дахъну гъахьну. Госпиталиъ дугъан 6 ражари операция гъапIну, кьюбсан операция апIуз ккими. Кьюб вазлиъ Каспийскдиъра госпиталиъ дахъну, хъасин думу Крымдиъ айи «Саки» санаторийдиз сагъламвал мюгькам апIуз гьаъну. Дилин Къайиб цIиб улихьнаси дуфну ими.

«Узу Каспийин флотилияйин 177-пи полкнан гьюлин пияда кьушмарин эскер вуза. Гьюлин пияда кьушмар флотдин важиблу пай ву, гьаддиз Урусатдин дявдинна гьюлин флотдин йигъ ич машкварра ву. Узу гъи Уьру Пайдгъин Каспийин флотилияйин дахилнаъди гъуллугъ апIурайивалиин дамагъ апIураза», – сюгьбатнан натижа гъивнийи жюрэтлу сержант Къайиб ТIагьировди.