Табасаран райондин Хянягъ гъулан кючйирикан сабдиин Урусатдин Игит Исрафил Мягьямедовдин ччвур иливиди. Мидкан муниципалитетдин кIулиъ айи Мягьямед Къурбановди 1-пи августдиъ райондин администрацияйиъ кIули гъубшу совещаниейиъ мялум гъапIну.

 

 

«Исрафил Мягьямедов – хусуси метлеб айи дявдин операцияйиъ Урусатдин Игит ччвурназ ва «Гъизилин Хяд» медализ лайикьлу гъахьи хьурпи дагъустанлу ву. Думу Хянягъ гъулаъ бабкан гъахьну, Херсондин аьтрафар азад апIбан женгариъ гъакIну. Дугъан игитвал, шак адарди, ихь имбу вари эскрариз нумуна ву. Багахь йигъари ихь игитрин ччвур дугъан багъри гъулан саб кючейиин иливбан серенжемар кIули гъахурхьа», – гъапнийи Мягьямед Къурбановди.

Кафари флотдин жаради вуйи арктикайин мотострелковый дестейин танкариз аькси ракетйирин батареяйин командир Исрафил Мягьямедов хусуси метлеб айи дявдин операцияйиъ 2022-пи йисан 23-пи майианмина иштирак шули гъахьну.

2022-пи йисан 1-пи октябриан 15-пи октябриз Исрафил Мягьямедовди регьбервал туврайи батареяйин дестейи Херсонский областдин Шевченовка, Украинка, ЦIийи Каменка гъулар уьрхбан женгариъ иштирак’вал гъапIну.

Чав Мягьямедовди ВСУ-йин 40-тIан артухъ бронетехника дагъитмиш гъапIувалиинди ВСУ-йин улихь дивнайи планар кIулиз удучIвуз гъитундар. Октябрин 15-пи йигъан ЦIийи Каменкайиина ВСУ-йи гьюжум апIурайи вахтна Мягьямедовдин танкариз аькси ракетйир йивру комплексдиина тIубкIру яракь ипру. Натижайиъ, гъагъи зийнар духьну, Исрафил Мягьямедов гъакIнийи.
Урусатдин Президент Владимир Путиндин къарариинди, Исрафил Мягьямедовдиз Урусатдин Феде-рацияйин Игит ччвур тувру.