Августдин ваз улубкьиган, Дагъустандиъ 1999-пи йисан гъахьи гьядисйир кIваин апIури шулу. 7-пи августдиъ, Шамил Басаев ва Хаттаб кIулиъ ади, ликрилан кIул’ина яракьламиш духьну, 2 агъзур террористарикан ибарат вуйи десте Чечен Республикайиан Дагъустандин БотIлих райондин ругариина гъафнийи. Экстремистар, радикальный исламдин фикрар тарагъури, Каспий гьюлин гъирагъарихънакьан гъягъбанди вуйи. Дурар ерли агьалйири чпи багьалу хяларси кьабул апIбаз ккилигури гъахьну.
Дурарин метлеб – халкьарин арайиъ душманвал ипуб, Дагъустан Урусатдихьан жара апIуб вуйи. Агъзрариинди дагъустанлуйир, хилиз яракь гъадабгъну, федеральный кьушмарихъди сабси багъри ругар уьрхюз гъудужвнийи. Дявдин женгар саб вазлитIан артухъ давам гъахьнийи. Думугандин гьядисйири, фукьан вягьши душман гъафишра, халкьдин сабвал душмандиин гъалиб шлувал субут гъапIну.
«Арайиъ айи вари наразивалар, гьюжатар гьархну, агъзрариинди инсанар Ватан уьбхюз гъудужвнийи. Думу читин йигъари дявдин женгар гъахьи БотIлихдиз гъафи Урусатдин Президент Владимир Путинди Дагъустандин халкьдин игитвализ заан кьимат тувнийи. Гьадмуган Президентдин терефнаан республикайин агьалйирихьна арайиз гъафи ккунивал гъира гьисс апIури имихьа», – гъибикIну чан телеграм каналиъ Дагъустандин Глава Сергей Меликовди. Дугъу гьацира халкьарин арайиъ, чвевалин регионариъ дуствалин аьлакьйир уьрхювалин важиблуваликанра дупна. «Ухьу уьмуми тарихну ва аьхю Урусатдихъан юкIв убгурайивали, багъри ругарихьна вуйи ккунивали, гьякь’вали, дюзвали, жвуван багахь хьайириз кюмекнан хил гьачIабккуз гьязур вуйивали сатIи апIура. Гьаддиз ухьхьан фукьан читин имтигьянра ужуди тувуз хьибди», – къайд дапIна республикайин кIулиъ айири.
Дагъустандин дирбаш баяри, Урусатди кIули гъабхурайи хусуси метлеб айи дявдин операцияйиъ Ватандиз вафалувал улупури, гъира дирбаш асланариси женгар гъахура. СВО гъябгъюрайи аьтрафариин саб Табасаран райондиан 50-ртIан артухъ эскрар уьмрихъ мягьрум гъахьну. Кьягьял эскрари, чпин абйирин намус ва гъир’ят, уьлкейин маракьар уьрхюри, жвуван юлдшар, ислягь халкь бадали игитариси жанар фида апIура.
