Гъябгъюрайи йисан республикайин мектебар рас апIуз 3,6 миллиард манат жара дапIна. Думу пулин дакьатарихъ Дагъустандин 139 мектебдиъ бина-йиан расвалин ляхнар кIули гъахиди.
РД-йин образованиейин ва илимдин министерствойин пресс-гъуллугънаъ къайд гъапIганси, гъийин йигъаз республикайин мектебариъ кIули гъахурайи расвалин ляхнар 80%-дихьна аьхирихъна дуфна. Вари мектебариъ кIули гъахурайи расвалин ляхнар вахтниинди ккудукIбан бадали, ,лихурайидарин кьадар артухъ дапIну, ляхник гьяракат кипну.
Гьаци, гъийин йигъаз республикайин 8 муниципальный образованйириъ ерлешмиш духьнайи 15 мектебдиъ расвалин ляхнар ккудукIну, хъа 31 муниципалитетдин 95 мектебдиъ гьязурвалин ляхнар тамам апIувал 75%-дихьна дуфна.
Мидланра гъайри, 15 муниципалитетдин 29 мектебдиъ расвалин ляхнар гьелелиг 50%-тIан тамам дапIнадар.
Табасаран райондин образование-йин управлениейин кIулиъ айирин заместитель Бахиш Аьгьмедовди ич сюгьбатнаъ къайд гъапIганси, гъябгъюрайи йисан бинайиан расвалин ляхнар кIули гъахбан программайик анжагъ Табасаран райондин Ккувлигъ гъулан мектебтIан кабхъундар.
«Бинайиан расвалин ляхнар кIули гъахру программайин дахилнаъди рас гъапIу мектебар мебелихъдира, жара авадлугъарихъдира тямин апIуру. 2022-пи йисан думу программайин сяргьятариъди райондин 6 мектеб, хъа дидиз улихьна йисан – 4 мектеб рас гъапIнийи.
Гьаму йисан Табасаран райондиъ саки 850-рихьна бицIидар сабпи классдиз гъягъюру. Гьяйифки, райондин вари мектебариъ 1-пи сентябрь улубкьайиз бинайиан расвалин ляхнар гъахиди, пуз шулдар. Гьаз гъапиш, гьелелиг райондиъ лапра гъагъи, яна аварийный гьялнаъ 12 мектеб гъузра. Дурар бинайиан расвалин ляхнар гъахру программайик кирчуз шулдар, фицики аварийный гьялнаъ айи мектебарин ерина цIийидар тикмиш дапIну ккунду.
Гъийин йигъан Табасаран райондиъ Хюрикк ва Туриф гъулариъ цIийи мектебар тикмиш апIура. Дурарикан йисандин аьхириз Туриф гъулан мектеб ачмиш апIуз планарик кайич», –гъапну Бахиш Аьгьмедовди.
Дугъу къайд гъапIганси, Туриф гъулан мектеб 80 урхурайириз деъру йишвар айиб хьибди. Мидланра гъайри, проектдиъ улупнайиганси, аьлава классар, лабораторйир, элебкнайи спортзал ва спортдин ачухъ майдан хьибди. Думу мектеб «Образованиейин артмиш’вал» федеральный программайин дахилнаъди тикмиш апIурайиб ву.
Аьхиримжи 5 йисандин арайиъ жюрбежюр программйирин ва проектарин кюмекниинди Табасаран райондин 58 мектебарикан 42 мектебдиъ бинайиан расвалин ляхнар кIули духна. Урхбан цIийи йис ккебгъайиз, имбуну мектебариъра расвалин бицIи-бицIи ляхнар кIули гъахура.
Шиклиъ: Табасаран райондин главайи ва администрацияйин вакилари Туриф гъулан мектебдин тикилишчивалин ляхнарин аьгьвалат ахтармиш апIури.
