Республикайн МЧС-дин мялуматнан гъуллугънаан туврайи хабрариинди, августдин 9-пи йигъан гвачIнинган сяаьт 10-диъ Мягьячгъалайин Айвазовскийин ччвурнахъ хъайи кючейин 6 мертебайин хуларин 5-пи мертебайиъ газ гъутIубкIну. Газ тIубкIувалин кьуватну 20 квартирайиз зарар тувну.
Мягьячгъалайин ГО-йи ва ЧС-ди зарар гъабхьи квартирйирин ва душваъ яшамиш шулайи инсанарин сиягь гьязур дапIна.
«Республикайин прокуратурайи гьадму хулариъ ишлетмиш апIурайи газдин оборудованиейин гьякьнаан ахтармишар гъахура. Силисчивалин органарира ахтармишар тешкил дапIна.
ТIубкIувалин кьувватну гъиришву хулар МЧС-дин органари ахтармиш апIура. Дурари чпин ахтармишар духну ккудукIнадар», – гъапну РД-йин прокурорин сарпи заместитель Руслан Ляпинди.
Газ гъутIубкIу хулариан 150 инсан, гьадрарикан 35 бицIидар, адаъну. Гьядиса гъабхьи йишв’ина 75 касдикан ибарат вуйи кюмек апIру дестйир, 22 машин, гьадрарикан 27 кас ва 7 машин МЧС-дин терефнаан, гъафнийи. ТIубкIувалиан инсанарин сагъламвализ гизаф зарар гъабхьундар, хуларин ва квартирйирин арайиъ айи цалар гъадаргъну.
Зарарнан кьимат ерли самоуправлениейин органари гьисаб апIура, экспертиза гъабхбан кьяляхъ, комиссияйи теклифар дивди.
Гьядиса гъабхьи йишв’ина МЧС-дин пишекрар хъуркьайиз, зарар гъабхьи хулариан инсанар адауз гъуншдиъ айи хуларин агьалйири кюмек гъапIнийи.
«Газ тIубкIувалин сес ебхьайиз, узу йиз хулаъ айза. Думу сес гъеебхьубси, жаргъури дина хъуркьнийза, гьеле МЧС-дин гъуллугъчйир дуфнадайи. Гъунши хулариан вуйи жигьил баярихъди гъутIуркIу хуларин подъезддиъ учIвнийча, душваъ биширугдиан бугъ абхънайи. Хуларин айвнарик кучIври, зарар гъабхьи хулариъ инсанар аш ахтармиш апIуз хъюгънийча. БицIир хъайи дишагьлийиз удучIвуз кюмек дапIну, арайиз дуфнайи цIа кабхъувал ктIубшвнийча. Сагъламвализ гизаф зарар гъабхьидар адайи», – гъапнийи гъабхьи гьядисайин шагьид Абакар Аьбдуллаевди.
Гьюрматлу ватанагьлийир, гьамцдар дюшюшар дархьбан бадали, газдин авадлугъар гьаммишан ичв гюзчиваликк гъитай, дурар ишлетмиш апIбан къайдйир уьрхяй. Газдин оборудование дивруган, пишекрариз теклиф апIинай.
