Август вазлин 6-9-пи йигъари Мягьячгъала шагьриъ III Вари халкьарин ватанагьлийирин форум кIули гъубшну.
Дидин ляхниъ РФ-дин Президентдин администрацияйин заместитель Мягья-медсалам Мягьямедовди, РД-йин Глава Сергей Меликовди, Узбекистан Республикайиъ айи Шанхайдин халкьдин дип-ломатияйин ватандашарин тешкилатдин центрин директор Кабулжон Сабировди, Урусатдиъ сатIиди яшамиш шулайи ихь ватанагьлийирин дес-тйирин 100, харижи уьлкйирн – 30 вакилари иштирак’вал гъапIну.
Форум Дагъустандин халкьдин шаир Расул Гьямзатов бабкан духьну 100 йис хьпаз бахш дапIнайиб вуйи.
Пленарный заседание ккебгъайиз улихьна Сергей Меликов ва Мягьямедсалам Мягьямедов НХП-йин хъуркьуваларин экспозицияйихъди таниш гъахьну ва республикайин китабарин выставкайиз гъилигну. Гьацира тарихи паркдин дараматдин фое-йикк хялариз Расул Гьямзатов-дин юбилейиз бахш дапIнайи выставкара тешкил дапIнайи.
Мягьямедсалам Мягьяме-довди Вари халкьарин ватанагьлийирин форумдин важиблуваликан гъапнийи. «Дагъустан халкьарин милли хусусивал, рюгьнан ва культурайин жарадариз ухшар дарувал уьрхюб ва гьацира ихь ватанагьлийирин чпин тарихи ватандихъди ва ихь аьхю уьлкейихъди – Урусатдин Федерацияйихъди вари терефариан аьлакьйир артмиш апIуб форумдин асас метлебарикан саб ву. Вари гьаму ихь уьлкейин Президент Владимир Путинди тяйин гъапIу государствойин милли политикайихъди хъабалгну гъюра», – къайд гъапIну М.Мягьямедовди. Дугъу гъапиганси, Дагъустан – варитIан гизаф жюрбежюр халкьар сатIиди яшамиш шулайи регион ву. Мушваъ гьарсаб халкьдин милли аьдатар, культура, чIал ва динар уьрхюра.
Урусатдин Президент Вла-димир Путиндира, III Вари халкьарин форумдин иштиракчйириз баркаллу ляхин ва кIваълан дурушру аку, марцци гьисар ккун апIури, тебрикнан кагъаз хътапIнайи.
«Урусатдиз аькси пропаганда гъабхурайи харижи уьлкйириъ багъри ватандин тереф ва маракьар уьрхюри яшамиш шулайи ватандашари уйнамиш апIурайи роль лапра аьхюб ву. Думу уьлк-йириъ айи ихь ватандашарихъди аьлакьйир уьрхбан месэлйириз Дагъустандиъ дикъатлу фикир тувра», – мялум гъапIну чан удучIвну улхбаъ Сергей Меликовди.
2021-пи йисан РД-йин Правительствойин жягьтлувалиинди харижи уьлкйириъ яшамиш шулайи ватандашариз кюмек тувбан гьякьнаан республикайин къанун кьабул гъапIнийи.
Сергей Меликовдин гафариинди, гъийин йигъан Дагъустанди 20-тIан артухъ уьлкйирин кюгьне культурйирин вакиларихъди сигъ аьлакьйир уьрхюра. Дурарин арайиъ Абхазия, Азербайжан, Беларусь, Киргизия, Узбекистан, Турция, Израиль, Сирия, Иордания ва жарадар а.
Мягьячгъалайиан Актауйиз, Стамбулиз, Ташкентдиз, Бухара-йиз, Тель-Авивдиз, Бишкекдиз ва Еревандиз самолетар тIирхувал къайдайиъ ипна. Думу уьлкйирихъди авиацияйин аьлакьйир айивали алверчивалин ва культурайин аьлакьйир мюгькам, туристарин кьадар артухъ апIуз мумкинвал тувра.
Форумдин важиблуваликан улхури, Сергей Меликовди, форум гъабхбаъ ва тешкил апIбаъ иштирак гъахьи Урусатдин Федерацияйин харижи ляхнарин министерствойиз, Рос-сотрудничествойиз ва Москва шагьрин правительствойиз чухсагъул мялум гъапIну.
