Гьаму йигъари Хив райондин глава Ярмет Ярметов Александр Невскийдин гьюрматнан медалиинди лишанлу апIувал метлеб вуди, Хив райондиз РД-йиъ коррупцияйихъди женг гъабхру комиссияйин гъуллугъчйир, «Дагъустандин десантникарин союз» ва «Кьибла Дагъустандин ветеранар-десантникарин союз» тешкилатарин вакилар гъафнийи.
РД-йиъ коррупцияйихъди женг гъабхру районарин арайиъ вуйи комиссияйин Дербент шагьрин отделин начальник Мурад Керимов кIулиъ айи делегацияйин дахилнаъ «Коррупцияйихъди женг гъабхру комиссия» ДРОО-йин председатель Расул Гьяжимусаев, Афгъанистандин гьядисйирин ветеран Мягьямедкьасум Салигьов, ВДВ-йин ветеран Ренад Керимов, погранкьушмарин вакил Марат Акимов айи.
Коррупцияйихъди женг гъабхру комиссияйи зиихъ кудухнайи тешкилатарихъди сатIиди СВО-йин иштиракчйириз ва дурарин абйир-бабариз кюмек тувбан гьякьнаан кми-кмиди серенжемар кIули гъахури шулу.
«Хусуси метлеб айи дявдин операция ккебгъу сабпи йигъланмина учу эскрарин 100-тIан артухъ хизанариин улукьуз ва дурариз кюмек апIуз гъушунча. СВО-йин хайлин эскрар кIваин уьрхбан медалариинди лишанлу гъапIунча. Жаради къайд апIуз ккундузузки, глава Ярмет Ярметов кIулиъ ади, Хив райондин администрацияйи гьарсаб ич серенжемдиз сарпидарди чпихьан удукьру кюмекнан хил гьачIабккуру.
Райондин кIулиъ айирин терефнаан кюмек ва гъайгъушин гьисс апIурайи СВО-йин иштиракчйирин абйир-бабарин ва гьацира эскрарин терефнаан Ярмет Ярметовдиз чухсагъул мялум апIури, дугъу аргъаж шулайи наслихъди гъабхурайи ватанпервервалин баркаллу ляхниз лигну, думу Александр Невскийдин медалиинди лишанлу апIуз ккундучуз», – гъапну Мурад Керимовди.
Райондин глава Ярмет Ярметовдира дуфнайи хялариз чан терефнаан чухсагъул мялум гъапIнийи.
«Хив райондин администрация медалиинди лишанлу апIувал варидариз тебрик апIураза. Фицики улупнайи медалик вари ихь райондин агьалйирин пай ка. Эгер ихь районди СВО-йиз хъадапIнайи рягьимлувалин гъагъ гьасабназ гъадабгъиш, думу уч апIуз вари райондин агьалйир сабхилди кюмек гъахьну. Агьалйирин кюмек дайиш, райондин кIулиъ айирихьан сарди думу ляхин кIулиз адабгъуз удукьидайи.
Гъуларин главйириз, депутатариз, мектебарин, бицIидарин багъарин, библиотекйирин ва культурайин хуларин кIулиъ айидариз ва гьацира администрацияйин вакилариз баркаллагь пуз ккундузуз. Дурари бизар дарди, чпин хушниинди вазлин сад йигъандин маважиб СВО-йин эскрариз кюмекназ жара апIури гъахьну.
Гъит ухьу арайиъ манишнан ялав ади, ислягьвалин ляхнариз кюмекнан хил гьачIабккури медаларин сагьибар ишри», – гъапну Хив райондин глава Ярмет Ярметовди.
«Табасарандин нурар» газатдин редакцияйи Хив райондин глава Ярмет Ярметов заан награда тувбахъди теб-рик апIури, дугъаз сагъ’вал, райондин идара апIбаъ хъана аьхю хъуркьувалар ккун апIура.
