Хьадан фасил рягьятвал гъадабгъуз вартIан ужуб вахт ву. Гьюл айи ва хьадан вахтна гизаф манишин шлу ихь республикайиъ гизаф касари азад вахт гьюлихъ гьапIру. Штун гъвалахъ хъайи вахтна ихтиятди духьну ккуниваликан аьгъдрур адаршра, гьар йисан хатIалу гьядисйир текрар шулу.
Дербент шагьрин пляжар фициб гьялнаъ аш ва дурариъ агьалйирин хатIасузвализ фициб фикир тувраш аьгъю апIувал себеб вуди, узу Дербент шагьрин Набережная пляждихъ ерлешмиш дубхьнайи Кьибла Дагъустандин инсанар агбан ва къутармиш апIбан МЧС-дин гъуллугънан начальник Малик Бабаевдихъди гюрюшмиш гъахьунза.
Малик Мирзакеримовичди Дербентдиъ айи чпин тешкилатди Дербент, Дагъустандин Огни шагьрариъ, Дербент, Табасаран ва Къули районариъ ляхин гъабхурайиваликан гъапнийи.
«Вари пишекрар алахьуз мумкин вуйи жюрбежюр гьядисйирихьна гьязурди айидар ву. Учу штуъси, цIа кабхъувалин дюшюшариъ, рякъяриъ шлу аварйириъ, йишвар гъутIурччву вахтна, дагълариъ шлу жюрбежюр гьядис-йириъра иштирак шулача. Гъубшу йисан Дербент шагьриъ гьюликк ккахьдар адайи. Хъа Дербент райондиъ гъубшу йисан чан ва чан чуччун шубур бицIидарра хъади жикIурайи, эскервалин гъуллугънаъ айи кас гьюликк ккахънийи. Дупну ккундуки, жикIуз ихтияр адаршра, ихь агьалйир штуъ учIвру. Бязи касар 4 метртIан ягъли лепйир али вахтна гьюлик кучIвну даккнивалин гъавриъ ади шулдар. Гизафси штукк ккахьрайидар арагъи дубхъну гьюлик кучIврайидар вуди шулу. Гьацира жикIуз ихтияр адру йишварихьна гъягъюз ккунидариинра хатIалу гьядисйир улуркьуру. Гизаф абйир-бабари чпин баяр-шубариз фикир туврадар. БицIир гьюлик жикIурайи вахтна гизафдар телефнариан гафар апIбиин машгъул духьнади шулу. Мициб гъайгъусузвал рябкъруган, мюгьтал дархьиди гъузуз шулдар»,
– кIура Малик Бабаевди.
Дугъу къайд гъапIганси, ццийин йисан гьюлин пляжар хьадан вахтнахьна гьязур апIури, водолазари гьюл ахтармиш дапIна. Гьацира, профилактикайин ляхин гъабхури, йишвариин али телевидениейиан, чпин сайтдиъ, жара СМИ-йириъ хатIалуваларикан кIура ва образованиейин тешкилатариъ баяр-шубарихъди, мялимарихъди, тербиячйирихъди, абйир-бабарихъди гюрюшар тешкил апIура ва гьюлин хатIалуваликан мялуматар кайи кагъзар тувра.
«Гьамусяаьт гьюлихъ хъайидар жара йишвариан шагьриз гъюрайидар ву. Йислан-йисаз дицдар касарин кьадарра артухъ шула. Шагьрин глава Хизри Абакаровдин тешкиллувалиинди, агьалйири рягьятвал йивру йишвариз фикир туври, гизаф ляхнар кIули гъахура. Гьамусяаьт палтар гьюдюхру кабинйир къайдайиз духну, душдикк жикIру йишвар тешкил дапIна. Ликар-хилар жикIру йишварихь хьайи, сач гъюргъю кранарин ерина цIийидар кивна. Вари йишвариъ шидра а. Муниципалитетди му пляждихъинди гъюру йишвахь рякъра апIуз хъюгъна»,
– давам гъапIну Малик Мирзакеримовичди.
Ич сюгьбатнаъ Малик Бабаевди швнуб-сабан ихь агьалйириз гьюлихъ хъайи вахтна хатIалуваликан гъапишра, дурари чпиз ккунибтIан дарапIруваликан къайд гъапIнийи. Гьамци кIурайи вахтна, му тешкилатдин унчIв`ан лигури, дугъу узуз 5-6 бицIи яшнан, аьхюдар багахь хьтарди жикIури, штуъ шадди вахт адапIурайи баяр улупу.
Ич сюгьбатнан кьяляхъ, му баяр шлихъди дуфнайидар вуш аьгъю апIуз, узу пляждихъна гъушнийза. Гьюлик 10-11-12 йисарин яшнаъ айидарсдар 6 бай, фужкIа аьхюдар багахь хьтарди, шадди ергури, тамашир апIури жикIурайи. Узуз дурар гьюлихъна шлихъди дуфнаш аьгъю апIуз ккун гъабхьнийзуз. Баяр жикIурайи йишвахь штуъ учIвну, узу, гъирагъдихъинди багахьси вуйириз дих дапIну, хил гъутIубччвза. Дурар багахьнаси гъафиган, шлихъди дуфнайидар вуш ахтармиш апIуз хъюгънийза. «Сарну балин адашдихъди дуфнача» пуз хъюгъю баяр, узуз думу адашдихъди гафар апIуз ккун гъабхьиган, мюгьтал гъахьи ва чпихъ сарун фужкIара хътруваликан ашкар гъабхьиган, штуан удучIвуз хъюгъю.
Му баяри чпиз абйир-бабари фужкIа хътаршра гьюлихъна гъюз ихтияр туврайиваликанра гъапнийи, хъа сарик гъалабулугъвал кабхъу ва узхьан: «Уву, дугъриданра, мухбир вуна?» – кIури, гьерху. Йиз фикриан, ухьу гьарган «йизур», «жараринур» дарпиди, ихь гъвалахъ, багахь хьайи, фужкIа хътарди айи баяр-шубариз фикир тувну ккунду. БицIидар вари ихьдар ву.
Гьелелиг пляжар марцциди ами. Вушра, гъюз хъюгънайи агьалйирихьан «кьяши салфеткйир» ва жара зирзибил дадабхъуз хъюгънайи. Дурар уч апIури, гьарсарин кьяляхъди лицрудар хьидар. Ухьу деъру, лицру йишвар марцциди уьрхбан бадали, гьарури гъайгъу дизигну ккунду.
Ццийин йисандин хьадан вахт хатIалу дюшюшар адарди гъябгъбан бадали, аьхюр – бицIир нирарихъ, гьюлерихъ гизаф ихтиятди духьну ккунду. Лап бицIидар штуъ айи вахтна, дурарин гъвалахъ мажбур вуди абйир-бабар хъади ккунду. Лепейиз инсафсузвал фтиз кIурушра аьгъдар.
