Гьаму йигъари Хив рйондин Чювекк гъулаъ чан ляхнин вазифйир тамам апIурайи йишв’ин йивну гъакIи РД-йин МВД-йин УСБ-йин полковник Мюгьюдин Урдиханов кIваин уьрхбаз бахш дапIнайи спортдин жаргъбаан (кросс) талитар кIули гъушну.
Хив райондин администрацияйин пресс-гъуллугънаан мялумат тувганси, думу талитариъ, яшназ дилигди, гизаф инсанар иштирак гъахьну. Спортдин серенжемдин вари иштиракчйир 2,5 километр манзилназ дажаргъну ккундийи.
Талитар РД-йин Халкьдин Собраниейин депутат Нариман Асваров кIулиъ ади Мюгьюдин Урдихановдин дустари тешкил гъапIнийи. Дурар вари му серенжем ачмиш апIбаъра иштирак гъахьну. Талитар ачмиш апIбан серенжемдиъ гьацира муниципалитетдин жигьиларин комитетдин гъуллугъчи Анзор Аьлиризаев, «Чювекк сельсовет» гъулан поселениейин глава Сабир Гьябибов, Мюгьюдин Урдихановдин багахьлуйир ва гъуландар иштирак гъахьну.
Му талитарикан улхури, РД-йин Халкьдин Собраниейин депутат Нариман Асваровди къайд гъапIганси, дуствал – гьавайи гаф дар. Дуствал гафназ аьхю ва дерин мяна а. «Мюгьюдин Урдиханов дустар гизаф ккунир, дустрахъан, гьякьлувалихъан, дугъривалихъан чан жан тувуз гьязур вуйи дустарикан вуйи. Гъи думу ихь арайиъ амдар. Хъа думу амдаршра, гьаммишан ич гъвалахъ хъайивал гьисс апIурача. Учу, дугъан ургур дустру, Хив райондиъ, дугъан багъри гъулаъ Мюгьюдин кIваин уьрхбан талитар тешкил апIуз кIваъ ният гъибиснийча. Ич ниятар кIулиз удучIвну. Учуз думу талитариинди жигьилариз, аргъаж шулайи наслиз дуствалин кьувватлувал, мюгькамвал улупуз ккундийчуз. Гьаму жюрейин спортдин талитари жигьилар сатIи апIуру, сар-сарин арайиъ дуствал уьбхюз кьувват тувру. Хъа дуствал кIван сабвалилан, ужуб гафналан, тереф уьбхювалилан ккебгъра», – гъапнийи Нариман Асваровичди. Дугъу жигьиларикан чпиин лихуб, спортдиин машгъул хьуб, багъри ватан, гъул гьадрархуб, абйир-бабар ккун апIуб, дустарин гьюрмат уьбхюб ккун гъапIнийи.
Жаргъуз гьязур духьнайидариз чухсагъул мялум апIбан мани гафар Мюгьюдин Урдихановдин имбуну дустарира, багахьлуйирира гъапнийи.
Жаргъбаъ гъалиб гъахьидариз варидариз пулин пешкешар тувну. Талитариъ дишагьлийирин арайиъ 3 йишв ва жиларин арайиъ 3 йишв жара гъапIнийи. Сабпи йишв гъадабгъдариз – 7 агъзур манат, кьюбпи йишван сагьибариз – 5 агъзур манат, хъа шубубпи йишв гъабхьидариз – 3 агъзур манат тувнийи. Мидланра гъайри, талитариъ иштирак гъахьи варитIан бицIи ва варитIан аьхю яшнан иштиракчйирра пулин пишкешариинди лишанлу гъапIну.
