Наргиз Гюлечова
10-пи феврали Дагъустандин Глава Сергей Меликов республикайин рягьимлувалин фондарин кIулиъ айидарихъди ва му ужувлан ляхнарин рякъюъ чпин терефнаан аьхю кюмек туврайи меценатарихъди гюрюшмиш гъахьну.
Серенжемдиъ уч духьнайидари, рягьимлувалин фондарина гьюкми сатIиди апIурайи ляхникан, читин гьялнаъ айидариз туврайи кюмекнакан ва ккудубшу йисандин натижйирикан гъулхнийи.
Мялум вуйиганси, Дагъустан Республикайиъ чпи апIурайи ляхнихъди саки вари дюн’яйиз машгьур духьнайи «Умуд», «Инсан», «Марцци юкIв» ва «Маргьяматлувалин дустар» ассоциацияйиз дахил шулайи хъанара хайлин жара фондар а. Сергей Меликовди му ассоцияация, ихь сабвалин ва сар-сариз кюмек апIури, ужудар натижйир улупурайивалин чешне ву, гъапну.
2022-пи йисхъанмина республикайин жямяаьтлугъдин уьмриъ «Вари сатIиди» кIуру фонднура мюгькам йишв дибисна. Му фонд асас вуди хусуси метлеб айи дявдин операцияйин иштиракчйириз ва дурарин хизанариз кюмек туврайиб ву.
«Кюмек апIувал, меценатвал ва эдеблувал – му гафар узуз саб тмунубдихьан зат жара апIуз ккундарзуз, фицики дурарин мяна саб ву. Учву апIурайи ляхниъ варитIан шад апIурайиб гьадму вуки, саб ражну кюмек дапIну гъузрадарчва. Эгер инсан эдеблур вуш, думу гьаммишан гьацир вуди гъузру. Умуд кивраза, ккудушу йисариси, ццира ухьу сатIиди ляхин апIур кIури, ва пуз ккундузуз: гьюкум гьаммишан учвуз кюмекчи ву.
Ухьу сатIиди апIурайи ляхин, читин гьялнаъ ахьу инсанари чпи пай кадабтIнайидарси гьисаб дарапIуз, гьацдар касариз кюмек бадали гъабхурайибдин вари гъаври ахьа», – гъапну сюгьбатнаъ республикайин главайи.
Дагъустандин фондари апIу-райи рягьимлувалин кюмек саб ихь региондиз дар. Аьхиримжи йисари дурари вари дюн’яйин дережайиъди кюмек апIура гъапишра, гъалатI даршул.
КIваин апIурхьа…
Турция, Сирия гьюкуматариъ жилар гъутIурччву йигъари, читинвалиъ ахьу касариз кюмек апIбан бадали, суткайин арайиъ телефнариан «Tooba» приложениейин кюмекниинди 150 миллионтIан артухъ манат пул уч гъапIнийи. Думу кюмекнак, Дагъустандин агьалйирси, вари уьлкейин агьалйирра ктикьнийи.
Гьаци магьа Палестинайиъ дяви гъябгъюри, ипIуз, алабхьуз, дахъуз йишвар адру касариз, Дагъустандин фондари кми-кмиди кюмекнан хил гьачIабккура. Фондариси, гъуларин агьалйирира чпин хилихъ хъайиб уч апIури, думу касариз кюмек апIуз чалашмиш шула. Гьаци, хусуси метлеб айи дявдин операция ккебгъхъанмина, душваъ иштирак шулайи эскрариз, дурарин хизанариз, миллетчйирихьан азад дапIну Урусатдин дахилнаъ учIву цIийи регионариз, дявдин женгар гъягъюри гъахьи Белгород ва Курск областарин агьалйиризра хайлин кюмек тувра.
Му жюрейин ляхин асас вуди «Вари сатIиди» фондну гъабхура.
«Къайд апIурза, гъи «Вари сатIиди» фондну тамам апIурайи ляхниъ, дакьатарси, гьар йигъан фондназ гъюрайи, аьхю дерд улубкьнайи касарин гъавриъ хьуз, дурарин кIван аьазаб жвуванубси кьабул апIуз кьувватра лазим ву», – давам гъапIнийи чан улхуб Сергей Меликовди.
Йисандин арайиъ республикайиъ рягьимлувалин кюмекназ харж гъахьи дакьатарин кьадар 3 миллиард манат гъабхьну. Думу кюмекнак хайлин дилаварчи касарира чпин пай кивна.
«Фондари гъабхурайи рягьимлувалин ляхниъ учвура иштирак гъахьундайиш, гъи кюмек рубкьурайи касарин сиягь яркьу апIуз шулдайи. Гьадму гьисабнаъди гьамусяаьт ихь Ватан уьбхюри, хусуси метлеб айи дявдин операцияйин иштиракчйириз ва дурарин хизанариз апIурайи кюмекра ктухураза. Гьарсар кюмек туврайи касди, пулин дакьатарси, гьадму кюмекнаъ чан кIван манивалра атIабгура. учвуз Варидариз чухсагъул», – гъапну, рягьимлувалин фондарин кIулиъ айидарихьна ва меценатарихьна илтIикIну Дагъустандин главайи.
