Ихь республикайиъ спортдиз аьхю гьюрмат а, хъа асас вуди бицIидарин ва жигьиларин спорт артмиш апIбаз фикир тувра. БицIидимиди спортдиин машгъул хьували жандин мюгькам сагъ’вал хъайи инсанар арайиз хуру.

Дагъустанлуйириз кьабул вуйи спортдин жюрйирикан саб – футбол ву. Йисандин фуну вахтна гъилигишра, жигьилар тупрахъ хъергну шулу. Дюн’яйин чемпионатарин натижйириинра гюзчивал гъабхуру.

Аьхиримжи вахтна республикайин шагьрариъ ва гъулариъ футбол уйнамиш апIбан деврин тIалабариз жаваб тувру майднар тикмиш апIуз хъюгъна.
Гьамусяаьт Дагъустандин экономикайин ва аьтрафарин артмиш’валин Минис-терствойи ерли тешкиллувалиинди кIули гъабхру ляхниз кюмек тувбан программа уьмриз кечирмиш апIура. Думу программайиз асас вуди, ерли мяна айи гизаф месэлйир гьял апIуз шулу: машинар гъягъру рякъяр, культурайин, спортдин, яшайишдинна коммуналин мяишатарин, туризмдин дараматар рас апIувал ва гьацдар жарадар.

Гьаму йисан РД-йин бюджетдиъ думу метлебариз 200 миллион манат улупна ва конкурс мялум дапIна. Республикайин бюджетдиан субсидйир гъадагъбан конкурсдиъ Дагъустандин муниципалин районар, шагьрарин округар, гьацира гъуларин поселенйир иштирак шула. Муниципалин образованиейихьан конкурсариз 5 проекттIан артухъ тувуз шулдар. Республикайин бюджетдиан муниципалин районариз ва шагьрарин округариз 5 миллион манатдиина, хъа гъуларин ва шагьрарин поселенйириз – 2 миллиондиина пул тувуз шулу.

Къайд апIувал лазим вуки, ерли тешкиллувалиинди кIули гъахру проектарин конкурсдин асас шартI – МО-йин бюджетдиан ва меценатари (девлетлу касари) пулин кюмек тувувал ву.

Дагъустан Республикайин экономикайин ва аьтрафарин артмиш’валин Минис-терствойи гьаму йисан 30-пи июндизкьан проектарин конкурсдиз аьрзйир кьабул апIуру.

Конкурсдиъ Табасаран райондин гъуларра иштирак шула. Думу гъуларикан саб – ГьепIил ву. ГьепIил гъулаъ 1260 агьали яшамиш шула. Душваъ жигьилари футбол гьарган ачухъ майдандиин уйнамиш апIури шулу. Деврин тIалабариз жаваб тувру футбол уйнамиш апIбан майдандикан гъулан жигьилари кми-кмиди фикрар апIури гъахьну. Гьамус, ерли тешкиллувалиинди гъабхру ляхниз кюмек тувбан программайиъ иштирак духьну, ГьепIил гъулаъ футбол уйнамиш апIру бицIи цIийи майдан тикмиш апIуз мумкинвал хьибди. Футбол уйнамиш апIру майдандиз агъзур квадратдин метр айи участок жара апIуз къарар адабгъна. Эгер конкурсдиъ гъалиб гъабхьиш, проект уьмриз кечирмиш апIбан бадали, республикайин бюджетдиан 2 миллион манатдиинакьан дакьатар жара апIиди, хъа гъулан поселениейин бюджетдиан саки 500 агъзур манат тувди. Проект уьмриз кечирмиш апIбан асас шартI – меценатдин иштирак’валра ву. Москвайиъ яшамиш шулайи ГьепIил гъулан агьали Аким Сеферов проектдиз кюмек апIуз гьязур ву. Думу дилаварчи касди чан гъуландариз 350 агъзур манат тувбанди ву.

Хъа Табасаран райондин «Гуми гъулан совет» МО-йин администрацияйи РД-йин экономикайин ва аьтрафарин артмиш’валин Министерствойи мялум дапIнайи «Ерли тешкиллувалин проектарин» конкурсдиъ иштирак хьуз девлетлу касар агура.

Гъулан поселениейин администрацияйи, проект-диъ иштирак хьпан бадали, 4 теклиф адагъну. Гъулан поселениейин агьалйирин собраниейи чпин сесер гъулан поселениейин администрацияйин дараматар рас апIбан проект-дихъанди тувну.

Проект уьмриз кечирмиш апIбахъди гюзчивал гъабхбан ва пулин кюмек тувру кас агбан бадали, собраниейиъ Темирлан Аьгьмедов кIулиъ айи тешкиллувлин дестера ктабгъну.

Табасаран райондин Къужникарин гъулан советдира, зиихъ гъапи конкурсдиъ иштирак хьпан бадали, чпин проектдиз пулин кюмек тувру кас агура. Дидин гьякьнаан «Табасарандин нурар» газатдин редакцияйиз Къужник гъулан администрацияйин вакили хабар тувну. Конкурсдиъ иштирак хьпан бадали, гъулан поселениейин агьалйирин собраниейиз 4 проект адагънийи. Гъулан поселениейин аьхюну пай агьалйири чпин сесер Къужник гъулаъ футбол уйнамиш апIру бицIи майдан тикмиш апIбан проектдихъанди тувнийи. Гьадму собраниейиъ проект уьмриз кечирмиш апIбиин гюзчивал гъабхуз Мягьямед ТIаибов кIулиъ айи тешкиллувалин дестера ктабгъну. Гьюрматлу ватанагьлийир! Конкурсдиъ иштирак хьпан бадали, учву гъизигу зегьмет зяя дарибшри. Учвуз гъул-жямяаьт бадали дапIнайи ужудар ниятар уьмриз кечирмиш апIуз Аллагь кюмек ишри.